Spreke seniorar på tur til Zakopane

Seniorgruppa til Kvinnherad Turlag har stor aktivitet. Den utlyste turen til Zakopane/Tatrafjella vart fullteikna på ein blunk. Dei 29 i reisefølgjet kom nyleg heim etter ei strålande veke på vandring i ukjende fjell.

Å komma seg til Zakopane er ganske enkelt: to timar med båt, to timar med fly og to timar med buss. Næraste flyplass er Krakow og Zakopane ligg oppunder fjella heilt sør i Polen, på grensa mot Slovakia. Den vetle fjellandsbyen er kjend for vintersport og får mange i Noreg til å tenkja på skihopping.

 

Naturopplevingar

Alle reisemål blir meir interessante når ein har med ein dyktig, lokal guide. Me var så heldige å ha med oss fjellføraren og kjentmannen Hubert. Ein ung og velutdanna kar med store kunnskapar om fjell og natur så vel som språk og kultur.

Han tok oss med på flotte vandringar i dal og fjell, også inn i Slovakia. Me vitja fleire kyrkjer og kloster, ein heilt unik kyrkjegard, og han synte fram sætrar, stølar og stadar der dei laga og selde den karakteristiske røykeosten, ein godbit frå dette området.

 

Historie og kultur

Zakopane var berre eit lite gruvesamfunn, men dette endra seg mot slutten av 1800-talet og utover 1900-talet. Då begynte byen å tiltrekkja seg turistar, høgt utdanna folk og kunstnarar frå Polen og andre land i regionen.

I dag er det årleg tre millionar reisande innom byen, mange av desse er interessere i skisport og klatring, men den interessante arkitekturen og Høglandskulturen er også ein magnet. I dag er det eksklusivt og dyrt å busetja seg i byen.

Arkitekten Stanislaw Witkiewich utvikla for 130 år sidan ein særeigen byggestil. Trehusa er kunstferdig bygd og utsmykka og har bratte tak. Me såg at utbyggjarane i dag er trufaste mot denne stilen, og det gjer Zakopane til ein vakker by, ulik alle andre.

Høglendarane er stolte av sin spesielle kultur og dialekt og byr svært gjerne på musikk og dans kringom i byen, på utescenar og restaurantar, iført sine vakre dame- og herrebunadar. Folkemusikken er i slekt med den ein finn i landa vidare sør og aust i Europa.

 

Fornøgde kvinnheringar

Dei høge fjella gjer at det kjem ein del nedbør i området. Dette fekk me merka på utfluktene våre dei tre første dagane av opphaldet. Det var litt surt å komma ut av fjellheisen på toppen av Kasprowy Wierchog, stå i 2000m høgde og stire inn i ein vegg av skodde. Men veret blei fint siste halvdelen og då fekk me verkeleg sjå kor vakkert  dette området er.

Takk til Turlaget og ansvarlege reiseleiarar for flott opplegg, og takk til deltakarane for kjempehyggeleg turfølgje!

 

Av Steinar Haugan