Stabile opplagstal

– Det er ingen grunn til bekymring sjølv om tabellen viser opplagsnedgang for Grenda i 2017. Dette handlar berre om utrekningsmetode, for realiteten er at vi eigentleg har svært stabile tal, seier dagleg leiar Jarle Håvik, som og viser til at Grenda er blant avisene i landet med best resultat for papiropplaget.

Onsdag føremiddag vart opplagstala for 2017 offentleggjort av LLA (Landslaget for lokalaviser). Her kjem Grenda tilsynelatande dårleg ut, men verkelegheita er slett ikkje så gale.

– Viss vi hadde rekna ut opplaget etter same metode som tidlegare, ville vi ha enda opp med så å seia identiske tal som i 2016. Grenda står no oppført med ein nedgang på åtte aviser i papiropplaget, noko som samanlikna med andre aviser i distriktet faktisk er veldig bra. Men i samband med at vi gjekk ned frå tre til to utgåver i veka, i november 2016, innførte vi eit nytt system der alle abonnentar vart omgjort til «komplett-abonnentar». Det vil seia at alle fekk både papiravis og nett-tilgang inkludert i prisen. Konsekvensen av det er at vi ikkje lenger får godskrive eit ekstra opplag for dei som tinga nett-tilgang. Dermed mista vi «bonusen» i opplaget som vi tidlegare har hatt, fortel Jarle Håvik.

 

Landsbasis

– Burde ikkje Grenda såleis ha halde fram med det same systemet som tidlegare?

– Nei, vi er meir opptekne av at kundane skal få eit godt totalprodukt, så denne nedgangen får vi heller ta i år. Vi ser at vi eigentleg sender ut like mange aviser som før, og vonar at vi kan visa til ein auke neste gong, seier Håvik.

På landsbasis er det berre 25 aviser som har betre endringstal i papiropplaget enn Grenda.