Stølsdag med opning av nytt sel

Søndag 23. juli vert det arrangert stølsdag på Kjeldestøl for 5. gong. Høgdepunkt i år vert opning av Peraselet.

Det er ein aktiv sommar på Kjeldestøl. Budeiene er til stades kvar onsdag til og med 2. august for å fortelja om stølen og selja sine vidgjetne mjølkekaker. I tillegg vert det komande søndag skipa til stølsdag for 5. gong.

På den fyrste stølsdagen i 2012 vart det feira at Bjørkesselet og Jensaselet stod ferdige. Året etter vart boka om Kjeldestøl lansert, og i 2014 vart Monsaselet opna. I 2015 vart det markert at Kristiansselet og utedassen stod klare. I fjor var det ingen nybygg på Kjeldestøl, så då vart det heller ikkje arrangert stølsdag.

Men no er det altså klart for opning av Peraselet.

– Peraselet, som er det gamle Kraksselet, er eitt av dei eldste på Kjeldestøl. Den einaste kunnskapen vi har om selet er frå eit fotografi frå kring 1920. Etter den tid har berre murane stått att. Vi har prøvd å byggja opp igjen selet så nær originalen som mogleg. Det betyr at vi også har reist hadletekkja, som vi kan skimta på biletet. Peraselet var det einaste selet på Kjeldestøl som hadde eit slikt tilbygg, opplyser Kjeldestøl venelag i ei pressemelding.

 

Skitstøvelkasting

Selet er ikkje ferdig innvendig, og førebels manglar også torv på taket. Men bygget er elles såpass ferdig at det kan opnast no.

– Vi vil takka Knut E. Skåla som har gjort ein fantastisk jobb som byggmeister, melder venelaget.

Med Peraselet er seks av sju sel gjenreiste, det inkluderer Siriselet som har stått der heile tida. Til neste år det meininga at det siste, Torkjellsselet, skal opnast.

Programmet for stølsdagen inneheld også natursti, musikk, lesing av prolog og skitstøvelkasting, tradisjonen tru. Budeiene er sjølvsagt på plass, og vil by på mat og drikke, heimelaga trestavar og den nye Kjeldestøl-koppen.