Stoppar Pop-up-butikk

Kvinnherad kommune snur og vil ikkje leiga ut lokale til den planlagde pop-up-butikken på Husnes.

I helga skulle eigentleg Popupstore Norge koma til Husnes for å selja mellom anna klede og sportsutstyr. Det var inngått avtale om bruk av Kulturhuset Husnes. Men no har eigar av huset, Kvinnherad kommune, snudd.

– Vi ser det som problematisk at ein aktør kjem inn for éi helg på kommunal eigedom og sel varer som også lokale butikkar tilbyr, sa ordførar Peder Sjo Slettebø i formannskapet torsdag kveld.

Det er altså ikkje sjølve konseptet som har ført til denne avgjerda, men det at kommunen såleis ville bli involvert i noko som hadde gått utover butikkane som held til i bygda fast.

– Vi har diskutert dette på rådhuset, og konkludert at det ikkje blir noko denne helga. Pop-up-butikkar er hjarteleg velkomne til Kvinnherad, men dei får ikkje ha utsal på kommunal grunn, sa Slettebø.