Stor kontrakt til iDrift

Pilene peikar oppover for iDrift om dagen. Torsdag vart det kjend at dei har sikra seg ein omfattande kontrakt med Norges Rytterforbund verd fleire millionar kroner.  

– For iDrift er dette både ein milepæl og ei stadfesting på at vi både har konkurranseevna og kompetansen til å heva oss i kampen om større nasjonale kundar, skriv dagleg leiar Stian Lauknes frå iDrift i ei pressemelding.

Kontrakten med Norges Rytterforbund inneber at iDrift skal utvikla og drifta nettportalen HorsePro for forbundet. Ein portal som årleg kan visa til over to millionar besøk. Og er ein felles plattform med informasjon om konkurransar, påmelding, betaling og annan nyttig informasjon knytt til utøvarar og arrangørar i rytterforbundet.

– Det er stort for oss å bidra til system som driver ein positiv aktivitet som er så viktig for mange over heile landet. Då særskild barn og unge, skriv Lauknes vidare.

 

Fleire folk og ny avdeling

Uavhengig av denne kontrakten har iDrift opplevd generell vekst den siste tida. Det fører no til at it-selskapet kan auka staben med fire nye tilsette.

– Vi jaktar alltid på dei rette hovuda, som både har kompetanse, entusiasme og som ikkje minst er svoltne på å prestera. Desse nye tilsetjingane kjem som ein konsekvens av generell vekst og ikkje på grunn av kontrakten med rytterforbundet, skriv Lauknes som ikkje avvisar at det kan bli fleire tilsetjingar i løpet av året.

– Vi tel no 40 tilsette. Vi ynskjer å veksa vidare slik at vi kan posisjonera oss for fleire store kundar, både lokalt og nasjonalt.

To av dei nytilsette vil halda hus på kontoret på Stord, ein i Haugesund og ein i Bergen, kor iDrift opnar ny avdeling.