Storslått sommarfilm frå Kvinnherad

Kameratane Aleksander Espevik og Stian Sundal har denne sommaren teke drone og iPhone fatt og laga ein flott reklamefilm for Kvinnherad.  

Under tittelen «Norways West Coast – Summer 2016» viser duoen fram Kvinnherad frå si beste side.

– Ideen vår var å laga ein film som vise kommunen vår, kor fin den kan vera og litt av moglegheitene som finst her, seier Aleksander Espevik.

I den halvanna minutt lange filmsnutten tek Sundal og Espevik oss med på ein flygetur over Husnes, Sunde, Halsnøy, Sandvoll, Bondhusdalen og Blådalen.

– Stian kjøpte seg ei drone for ei stund sidan, og då byrja ballen å rulla. Så mellom jobb og studie har vi brukt ettermiddagane til å filma. Alt er film med anten drone eller mobiltelefon, seier Aleksander.