– Strålande sankthansfeiring i Bergslagen

Sunde Kyst og Litteratursenter inviterte torsdag bygdefolket til sankthansfeiring i Bergslagen for første gong, no håpar dei at det skal verta ein tradisjon.

– Det vart ein utruleg kjekk kveld. Vi grilla, brente bål, padla kano og hadde fleire aktivitetar for ungane. Og folk koste seg. Sundefolket møtte opp i hopetal og skapte strålande stemning rundt bålet i

Bergslagen, seier leiar i Sunde Kyst og Litteratursenter Kjell Magne Stråbø.

Dette var eit prøveprosjekt Sunde Kyst og Litteratursenter stelte i stand for å sjå om innbyggjarane i bygda var interessert i å feira sankthans i Bergslagen. Noko dei tydeleg var.

– Det var veldig god oppslutnad, totalt var det kring 120 personar innom. Eg vil takka alle som var med på å gjera dette til ein strålande kveld, og det freistar til gjentaking. Forhåpentlegvis vert dette ei årevis hending i åra som kjem, sluttar Stråbø.