– Striden om Fjelberg Kraftlag

I lokalavisene kan vi under dramatiske overskrifter lesa at det føregår dels dramatiske, ulovlege og endåtil kriminelle handlingar i Fjelberg Kraftlag. Utgangspunktet er at kraftlaget sine medlemmer har innsett at regelverk og tilhøva elles ikkje lenger ligg til rette for drift av slike små kraftlag. Det er også av same grunn ei rekkje kraftlag på same storleik rundt om i heile landet er i same situasjon. Tida har rett og slett gått frå dei.

 

Kva er det eigentleg som føregår, og kva er det som ligg bakom slike «dramatiske» overskrifter i avisene? Styret i Fjelberg Kraftlag har, i tråd med medlemmene sitt ønskje og vedtak, starta ein prosess for delvis å reorganisera selskapet, slik at det blir som overordna styresmakter krev. Delvis også for å finna ein ny eigar, då blant anna nettleiga skyt i veret med få kjøparar å dela kostnadene på.

 

I tråd med mandatet frå medlemmene har styret teke tak i dette. Dei heldt møte og orienterte om arbeidet sitt og la fram forslag til vidare prosess. Det er vanskeleg å ikkje nemna at styret hadde gjort ein svært god jobb, og peika på ei løysing, som etter vår meining låg over det vi kunne forventa. Løysinga dei peikar på inneber at medlemmene i laget kan få ut verdiar som er historiske. Laget eller medlemmene vil få tilført 310 millionar kroner.

 

Laget må gjennom ein prosess, der samyrkjelaget Fjelberg Kraftlag via ei omdanning, endar opp i eit aksjeselskap, som medlemmene blir eigar av. Det er ei komplisert sak for dei fleste, og styret har derfor henta inn ekspertise frå dei største og tyngste advokatselskapa i landet. Prosessen er nøye beskrive i dokumentet «Integrasjonsavtale», som saman med søknad til Lotteri- og stiftelsestilsynet, skal sendast til godkjenning.

Det er Lotteri- og stiftelsestilsynet som har mynde til å godkjenna slike transaksjonar. Tilsynet tar som venteleg berre stilling til konkrete saker, og derfor må kraftlaget få gjennomført omdanninga frå Fjelberg Kraftlag SA til Fjelberg Kraftlag AS, før søknad kan sendast. Når dette er gjort (transaksjonen vil venteleg bli godkjent på møtet 6. desember), vil kraftlaget kunna senda søknad til Lotteri- og stiftelsestilsynet for avgjerd.

 

Styret fortener honnør

Det er ikkje mogleg å sjå kva som er ulovleg i denne prosessen. Styret har etter vår meining eit godt fagleg grunnlag, basert på arbeid utført av dei beste og tyngste advokatmiljøa i landet, så vi burde stå saman å gi dei honnør! Kva vi får lov til og ikkje, er det Lotteri- og stiftelsestilsynet som tek avgjerd om. Styret i kraftlaget si oppgåve er å fremja medlemmene sine interesser så godt som mogleg. Skulle vi då, vi som berre har fordelar av det styret sitt iherdige arbeid har ført fram til, setja kjeppar i hjula, og i verste fall setja stoppar for eit historisk økonomisk tilskot til medlemmene?

Styret kan sjølvsagt ikkje garantera noko. I denne saka er det staten ved Lotteri- og stiftelsestilsynet som tek avgjerda, og vi som eigarar burde alle som ein stått bak styret i deira arbeid!

For å vera på den sikre sida har vi, utanom styret, kontakta advokatfirmaet Thommesen AS, som blant anna svarer:

«Prosessen som pågår med omdanning er fullt ut i samsvar med norsk lov». Og vidare: «Den enkelte aksjonær kan omsette sine aksjer (i den grad han/hun finner en kjøper, og de blir enige om prisen)».

Aksjane kan seljast, slik vedtektene no lyder, til kjøpar som er busett innanfor kraftlagets virkefelt, eller nedslagsfelt. Men dette er opp til selskapet sjølv å avgjera. Altså er hemmelege avtalar, som det er antyda, ikkje ein del av opplegget. Det er norsk lov om aksjeselskap som gjeld. Vi på vår side tar avstand frå slik mistenkeleggjering, som kjem fram lokalavisene. Informasjonen som er gitt av styret i kraftlaget, er bekrefta å vera rett.

 

Det er også blitt hevda at ved å sitja på aksjane i Sunnhordland Kraftlag, og berre selja linenettet vårt vil gje ei høgare avkasting. Dette er også feil. Ein kan om ein vil, velja å sitja med aksjar i Haugaland Kraft, og ta imot utbyte, som gjev eit høgare utbyte enn SKL. Vi føler oss derimot overtydd om at dei aller fleste ønskjer å gjera aksjane om til «klingande mynt».

Det er for oss ikkje mogleg å sjå det annleis enn at utspelet i lokalpressa må ha sin bakgrunn i ei gedigen mistyding. Ein burde venta med slike bombastiske utspel til ein hadde nødvendig informasjon.

 

Lesarbrev av:

Gerhard Eide

Leif Helge Særsten

Roar Sæbø

Tor Bjelland

 

[gravityform id="11" title="true" description="true"]