Svar og vinnarar 23.-27. desember

Då har vi teke eit skippartak og trekt vinnarar frå vetle julaftan til og med i går.

Onsdag 23. desember viste filmen peparkakehus som står i Husnes storsenter. Det visste Helge Naterstad på Seim. For innsatsen får han tilsendt to Flaxlodd.

På julaftan spurde vi kva kyrkje som er eldst. Veldig mange svarte Kvinnherad kyrkje, men det er feil. Ænes kyrkje er nemleg nokre få år eldre. Det visste Sigbjørn Øye på Seim. Han kjem også med litt folkeopplysning: "Ænes kyrkja er frå slutten av 1100-talet. Den er om lag 60 år eldre enn Kvinnherad-kyrkjo i Rosendal. Eg har vore i nokre begravelsar i kyrkja, men den er så liten at eg kvar gong har måtta stått ute".

Fyrste juledag serverte vi ei skikkeleg quiz-felle då vi spurde kor mange 80-soner det er på vegane i Kvinnherad. Dei fleste svara varierte mellom 30 og 35, den høgaste teorien var 41. Berre ein person visste fasiten, men han jobbar i Mesta. Rett svar er, tru det eller ei, 0, noko Leif Nygård i Rosendal svarte. Han legg til: "Men det er 33 soner med lovleg fart opp til 80 km/t på fylkesvegane".

Andre juledag lurte vi på kor mange politiske parti som er representerte i kommunestyret. Mange svarte sju og åtte, men det er faktisk ni. Det er: Frp, Høgre, Venstre, KrF, Senterpartiet, Miljøpartiet Dei grøne, Arbeidarpartiet, SV og Raudt. Vinnaren er Janne Fausk frå Blystadlia.

Også i går var det mange som gjekk i fella. Den berømte båten vi spurde etter er ikkje Gurine, men Gjøa. Dei to som stilte spørsmålet var Gjøa Rosvold og Victoria Ringdal Stølen. Kanskje du la merke til at Victoria snakka oslosk og sa at båten ligg i nærleiken av heimen hennar? Gjøa ligg nemleg på Bygdøy. Vinnaren vart Elisabeth Berge frå Strandebarm.

Vi gratulerer alle dei dyktige vinnarane!