– Takk, Peder

Det kom som sjokk på veldig mange då ordføraren vår, Peder Sjo Slettebø, kunngjorde at han ville trekkja seg som ordførarkandidat for Høgre for neste periode. Peder har vore ein særs populær og dyktig ordførar, noko som vert sterkt understreka av alle dei tilbakemeldingane han fekk etter at dette vart kjend, både frå Høgre-folk, men og frå politiske motstandarar.

Peder har vore engasjert og uredd i jobben som ordførar og har jobba hardt for Kvinnherad inn mot fylket, storting og regjering. Dette ser vi resultat av. Han har vekt oppsikt for evna til å ordleggja seg og for sin humoristiske sans og vore på alle måtar ein god representant for Kvinnherad.

Styret i Kvinnherad Høgre syns det er leit at Peder har vald å trekkja seg som ordførarkandidat for neste periode. Vi er imponert over måten Peder har styrt kommunen på og engasjementet han har vist og for å gjera politikken både morosamare og meir fargerik. Styret er samstundes glad for at Peder framleis er førstekandidat på lista og har gitt uttrykk for at han vil engasjera seg sterkt i valkampen og politikken i neste periode. Det er vi særs takksame for.

Velkommen, Leif Sverre

Medlemmane i Kvinnherad Høgre har no vald Leif Sverre Enes til å overta som ordførarkandidat. Vi er glad for at Leif Sverre tok den krevjande utfordringa og vi føler oss heldige som har så erfaren og dyktig politikar på andreplass på lista og som no er klar til å bli ny ordførar for Kvinnherad. Leif Sverre er mellom anna oppteken av næringslivet, landbruk, oppdrett, turisme og bustadbygging. Han har og engasjert seg for at folk får betre tilgang til sjø og båtliv.

Leif Sverre har i noverande periode vore gruppeleiar for Høgre. I denne perioden har Høgre vist at partiet er oppteken av levande bygder i heile kommunen. Sjeldan, eller aldri, har det vore gjennomført så mange prosjekt så mange stadar som dei fire siste åra. Når det vert hevda at Leif Sverre berre er ein politikar for deler av kommunen, er det ein påstand som fell på sin eigen urimelegheit.

Kvinnherad Høgre ser fram til valkampen som så smått er i gong og som heilt sikkert vil tilspissa seg fram mot valet i september. Eg håpar at vi kan få ein god og reieleg valkamp med mange, gode og interessante diskusjonar. Samstundes håpar eg på at vi kan skilja mellom person og sak. Lat oss vera saklege, snakka om det som betyr noko og som er til det beste for Kvinnherad.

På vegne av styret i Kvinnherad Høgre

Erlingur Nielsson, leiar