Telenor aukar tryggleiken på Folgefonna

Til stor glede for aktørar på og rundt breen, har Telenor no etablert 4G-dekning på Folgefonna.

– Stadig fleire vitjar breen, og ikkje alle skjønar kva som er farleg og ikkje. Difor er det kjempebra for tryggleiken at me no får 4G-dekning. På den måten kan folk be om hjelp dersom dei ikkje er med guide og treng hjelp, seier dagleg leiar Åsmund Bakke i Folgefonni Breførarlag i ei pressemelding.

 

Har vore eit sakn

Bakke og kollegane hans har dei siste 25 åra lagt fleire tusen timar bak seg på Fonna. Fram til no har dei nytta seg av alternative kommunikasjonsformer, som blant anna satelittelefon og sikringsradio, ved behov. No ser dei fram til å kunna bruka mobiltelefon.

– Dette gjer det langt lettare for oss. Me har sakna god telefondekning, så det er ingenting som er betre enn at me no får 4G, seier breføraren i ei pressemelding.

Bjørn Amundsen er dekningsdirektør i Telenor Norge, han er glad for at dei no kan bidra til betre dekning på breen.

– Vi har dei siste åra gjort ei betydeleg modernisering av basestasjonane i mobilnettet og sørga for 4G-dekning til dei aller fleste der dei bur. Heile dette oppgraderingsprosjektet viser kor viktig dette er for folk flest. Å ha mobildekning der ein ferdast er svært viktig for alle våre kundar, seier Amundsen i pressemeldinga.

 

Kanonpåske på Snapchat

Påsken er rett rundt hjørne, og det er mange som er fortvila over snømangel i påskefjellet. Det er ikkje tilfelle på Folgefonna.

– Me har om lag åtte meter snø og svært gode forhold. Når me no får 4G-dekning i tillegg så ligg alt til rette for ein kanonpåske her hos oss, seier dagleg leiar Michael Iversen i Fonna Glacier Ski Resort og legg til:

– Me ventar svært mange vitjande, så i høve opninga og betre mobilnett har me fått på plass vårt eige Snapchat-filter.