Ti personar i karantene etter onsdagens smittetilfelle

Onsdag ettermiddag fekk kommunen sitt 10. smittetilfelle etter nyttår. Eit tilfelle som førte til ein god del smittesporingsarbeid.

– Det var ein ung person som hadde feira jul utanlands, og som hadde kome tilbake til Norge. Han leverte ein positiv andre test, seier kommuneoverlege Glenn André Opland om importsmitten som var påvist i Kvinnherad onsdag ettermiddag.

Det betyr at testen vedkomande tok då han landa i Norge først var negativ, og at smitten først vart påvist då vedkomande tok sin andre koronatest. Det igjen førte til ein god del smittesporingsarbeid for kommunen.

– Det vart ein del arbeid med smittesporing onsdag ettermiddag og kveld. Det er cirka ti nærkontaktar som no er i karantene. Vi er ferdige med smittesporinga no, men det vart kanskje litt meir arbeid enn det burde, seier Opland.

Det har vore ein travel smittestart på 2021 i Kvinnherad, som no har fått påvist ti nye tilfelle i løpet av årets 14 første dagar.

– Vi håper at vi klarer å fanga opp desse som testar positivt, at vi klarer å smittespora bra og igjen hindra vidare spreiing. Og det har det sett ut som at vi klarer. Men det har vore mykje no etter nyttår, så det er viktig at folk framleis følgjer dei smitteverntiltaka som gjeld, seier Opland.