Tilbake i klasserommet – for første gong i russedress

Etter nesten to månadar med heimeskule, kunne KVV-elevane endeleg venda tilbake til ein meir normal skulekvardag måndag morgon. Ein stor dag for både elevar og lærarar.

– Det er deilig å vera tilbake. Det har vore nokon kjedeleg veker dette her, du kjenner jo at du saknar venene dine etter så lang tid. Og sjølv om vi har hatt undervisning saman digitalt, så blir det ikkje det same når vi sit kvar for oss føre ein pc med mikrofonen av. Det skal bli godt å få det klasserommiljøet tilbake, seier russepresident Torstein K. Olsen.

 

Har flytta russetida

Vi møter han utanfor KVV måndag morgon. Dagen der alle landets elevar igjen får koma tilbake til ein nokolunde normal skulekvardag igjen. Det etter åtte veker med digital undervising heime i eigen heim.

– Det har vore ein vrien situasjon for mange, men eg synest at lærarane har gjort ein god jobb. Det er varierande kva digital bagasje dei forskjellege lærarane hadde frå før, men dei har gjort sitt for å leggja til rette for ein best mogleg lærekvardag. Personleg så synest eg det har gått veldig bra, men no skal det bli veldig kjekt å sjå resten av gjengen igjen, seier Torstein.

Det er 11. mai, og russetida går i grunn mot slutten. Trass det er dette første skuledag russepresident Olsen og resten av russekullet på KVV møter opp i russedressen.

– Endeleg, får ein nesten seia. Så handlar det no om å gjera det beste ut av den tida vi har igjen, seier han og legg til:

– Men vi bestemte oss tidleg for å utsetja russetida til 16. juni. Alt av faste arrangement som dåp, bryllaup og slike ting er flytta til midten av juni. Det betyr at vi tek av oss russedressen som vanleg etter nasjonaldagen, men så kastar vi oss i han igjen i juni for å feira den utsette russetida vår, seier han.

 

– Godt førebudd

Sjølv om både Torstein og dei andre KVV-elevane har sett fram til å møta alle klassekameratane sine igjen, vil ikkje alle bli samla heilt med eingong. Rundt om på skulen heng lappar som ei påminning på dei retningslinjene elevane skal følgja, og handspriten er lett tilgjengeleg uansett kor på skulen du er. I tillegg er dei største klassane delt i to.

– Vi skal ha periodeisert undervising, der vi deler klassane i to. Det blir halve fagøkter der vi kombinerer både klasseromundervising og heimeundervisning. Halve klassen møter på skulen medan resten er heime, så rullerer dei på det, seier rektor Audun Bjelland.

Han er glad for å endeleg kunna ta i mot elevane på skulen igjen, etter å ha heldt det gåande med heimeundervisning i det som nærmar seg 20 prosent av undervisningsåret.

– Det har vore ei utfordrande tid for mange. Vi har prøvd så godt vi har kunna å leggja til rette for ein best mogleg skulekvardag, og så har vi justert oss undervegs om det har vore nødvendig. Eg føler vi har løyst det godt i den tida som har vore, men no er det veldig godt å få elevane tilbake, seier Bjelland.

Statsminister Erna Solberg si melding torsdag i førre veke om at skulane skulle opna opp for resten av elevane allereie påfølgjande måndag kom brått på mange, var KVV godt førebudde.

– Vi har hatt yrkesfagelevar på skulen sidan 27. april, og har med det godt innarbeidde rutinar og retningslinjer vi følgjer. Det kom brått på, men vi var klare for det. Vi har fjerna pultar i klasseromma og har gode rutinar på vasking og desinfisering av klasserom. I tillegg informerer vi elevane godt på korleis kvardagen no blir med skikkeleg handvask, avstand og hostehygiene. Så her skal både elevar og lærarar vera trygge, sluttar Bjelland.