– Tilsvar på tilsvar, Klasseskilje- og personalpolitikken i kommunen

Eg synes det er fint at lokalavisa Grenda gjev høve, til dei instansane eg har nemnt i lesarbrevet mitt i lokalavisene denne veka, om tilsvar på innspelet.

Kommunedirektøren gjev eit kort tilsvar i Grenda i dag, der ho viser til omgrepet «Personalsak». Dette stadfestar akkurat det eg skriv i lesarbrevet; at administrasjonen kjapt grip til omgrepa «Styringsrett og Personalsak». Dette er ein utidig hersketeknikk, og kan sette ein effektiv stoppar for ei drøfting. Det kunne også ha skjedd i denne viktige saka, som gjeld personalpolitikken i kommunen.

Kommunedirektøren skriv at «vi» (der står ikkje kven «vi» er) har ei anna oppfatning av «verkelegheita» enn det underteikna har. Kvifor kan ikkje kommunedirektøren heller fortelje om deira verkelegheit, i forhold til det eg skriv om ?

- Er det slik at 100 sjuke personar i organisasjonen, kvar dag- og over år, er svært alvorleg?

- Er det slik at dei hovudtillitsvalte og hovudverneombodet har sine kontor i Rådhuset, nær

administrasjonen?

- Er det slik at der ikkje vert skipa medlemsmøte for dei fagorganiserte?

- Er det slik at dei ufaglærte har ei særs låg løn – ei løn ein ikkje kan leve av?

- Er det slik at dei tillitsvalte og arbeidsgjevar «dyttar/presser/lokkar» ufaglærte til å

måtta/villa ta ei formell utdanning?

- Er det slik at der er mange leiarledd frå den tilsette på golvet, og fram til dei som er tildelt

makta for å endre «ting»?

- Er det slik at eit innspel via mange ledd, kan endre seg og/eller forsvinne på vegen?

- Kva vert gjort av Kvinnherad kommune som ei Inkluderande Arbeidslivs-bedrift?

Desse, og enno fleire spørsmål kunne det vore viktig at allmugen, inkludert politikarane,

vart informerte om. Og eg håpe kommunen vil vere med og drøfte SAK, og ikkje avfeie innspel ved bruk av hersketeknikk.

 

Av:

Møyfrid Kristoffersen

sosionom/AFP-pensjonist

Uskedalen, 29.september 2020