Trappar opp vatningsforbodet

Kvinnherad kommune innfører no totalforbod mot vatning med slange og spreiar i Husnes vassverk sitt forsyningsområde.

Torsdag i førre veke innførte kommunen vatningsforbod på Husnes, Sunde, Valen, Halsnøy og Matre, men då med ei opning for vatning mellom klokka 19 og 21 på kvelden.

No trappar dei opp forbodet og fjernar moglegheita for å vatna plenen på kvelden.

– Det er ikkje det at det er tomt for vatn her, men forbruket er så stort at dei som bur høgast får lågare trykk, seier einingsleiar Egil Eide i vatn og avløp i Kvinnherad kommune.

I det tidsrommet det var opna for vatning måndag, gjekk det merkbart utover dei høgtliggjande abonnentane.

– Det gjekk ut mange kubikk med vatn i det tidsrommet måndag, og den kjedelege konsekvensen då er at dei som bur høgast får veldig lågt trykk. For å sikra vatn til høgtliggjande abonnentar vert gjeldande vatningsforbod utvida, seier Eide.

Forbodet gjeld fram til melding om oppheving vert sendt ut frå kommunen.