Tre telestolpar velta i vinden

Måndag morgon hadde tre telestolpar på Løfallstrand velta i den sterke vinden. Kvinnherad Energi gjorde Televerket ei beine og retta dei opp att.

Georg Hestad, Sindre Dahle og Stian Sørheim tok på seg oppdraget, sidan det ikkje er så lett å få tak i folk frå Televerket som frå det lokale energiselskapet. Ein av stolpane låg nemleg over vegen borte ved den gamle skulen på Løfall, og der stoppa trafikken opp fordi dei store bilane ikkje kom seg under leidningane. Dei to stolpane ved skulen var allereie retta opp då Grenda kom kring klokka 09.15, men då heldt karane frå Kvinnherad Energi på med ein skakk stolpe på garden der Dag Petter Vestfossen bur.

Vestfossen hadde vakna tidleg av den sterke vinden.

– Kjellardøra hadde blåse open, og dermed kjendest det ut som om golvet letta i huset. Då vakna eg, kan du seia. Og då eg såg ut oppdaga eg stolpen, fortel Vestfossen.

Hestad, Dahle og Sørheim hadde ein tøff jobb med å få stolpane på plass, i og med at vinden framleis bles sterkt medan dei arbeidde.

– Det er litt utfordrande å klatra i stolpar når det blæs så mykje, men no har vi fiksa dei tre stolpane, seier Georg Hestad i Kvinnherad Energi.