Turlaget gjentar adventssuksessen

I fjor starta Kvinnherad Turlag med kalenderturar i adventsdagane. I år gjentar dei suksessen.

– I fjor gjennomførte Kvinnherad Turlag noko me aldri hadde prøvd før: Adventskalender med turar i dei aller fleste bygdene i Kvinnherad! Dei fleste turane gjekk i mørke på ettermiddag og kveldstid. Mange turdeltakarar rosa initiativet. Fleire hadde ikkje noko erfaring med turar i mørke. Det vart mange flotte turar og kjempemotiverte turleiarar, fortel Gunnlaug Vågen Tjelmeland i Kvinnherad Turlag.

Avisene var med på adventskalenderen, med turar i både nett- og papiravisene.

– På siste turleiarsamlinga lufta me for turleiarar om det var stemning for kalender i år. Det er det! smiler Tjelmeland.

Første turen går naturlegvis 1. desember, med start og mål på Bjelland på Sunde. Det er rett nok ikkje turar alle dei 24 dagane fram mot julaftan, men turane blir presenterte i Grenda som ein dag for dag-kalender på nett, noko meir puljevis i papiravisa.

God tur!