Turlaget nyttar klageretten

Kvinnherad Turlag har bestemt seg for å klaga på NVE sitt vedtak om løyve til å byggja ut Onarheim kraftverk.

I klagen turlaget sendte inn torsdag vert det blant anna peika på at Husnes er eit industrisamfunn som allereie er sterkt prega av store tekniske inngrep.

– Store industrihallar og store kraftmaster. Men så har vi – ganske sentrumsnært – Hellandselva som gjev liv i naturen, som syner fossar og stryk, som veks og som minkar, som durar, syng og kviskrar – og på den måten balanserer noko av alle tekniske inngrep, heiter det i eit utdrag frå klagen.

Dei peikar også på at demninga og dei store inngrepa langs røyrgata vil vera godt synleg frå Husnes sentrum.

– Me vel å nytta oss av klageretten vår som eit siste forsøk på å verna området frå kraftutbygging, skriv turlaget på Facebook.