Understrekar koronareglane og gjer tiltak

Dei nye reglane og tiltaka som regjeringa innførte søndag, blir følgt opp lokalt.

– Me sat i ein liknande situasjon for noko tid tilbake. I haust sa me at kvinnheringane og samfunnet elles måtte vera budde på inngripande tiltak. No er me der igjen. Kvinnherad kommune har eit stort ansvar for å bidra til å halda smitten nede. Dei neste 14 dagane blir krevjande, men dette skal me klara. Me har vore flinke til no, og me står saman vidare, sa ordførar Hans Inge Myrvold då han opna pressekonferansen i kommunestyresalen måndag.

Han peika på at ein meir enn nokon gong må vera varsame og halda avstand.

–  Viss ein ikkje klarer det, så er munnbind tiltaket å nytta seg av. Dei som kjenner på symptom, bør ta ein test. Det viktigaste er å ha kontroll på smitten, og det får me ved å testa oss, la Myrvold til.

 

Får konsekvensar

Kommunedirektøren slo fast at når det blir sett inn nasjonale smitteverntiltak, så får det lokale konsekvensar.

– Det blir mindre sosial aktivitet, blant anna ved at ein må unngå gjester heime. Idrett og kultur utøvd innandørs må avgrensast. Me veit at noko kulturskuleaktivitet må gå ut, og me held ungdomsklubbar stengt inntil vidare. Ungdomskulane er på raudt nivå, som betyr utegym og stenging av idretts- og symjehallane. Me skal skjerma barn og unge, og ivareta deira kvardag med barnehage og skule, sa Ragnhild Bjerkvik.

Smittesituasjonen i Kvinnherad er ikkje dramatisk, seier ho, men understrekar at ein gjer desse tiltaka for å førebyggja smitte.

– Folk har vore i lag, og trass i råda som har vore gitt, er det mogeleg å bli smitta. Det får følgjer i form av reduksjon av somme tenester. Brukarar av tenester som blir råka, blir informert. Innbyggjarane må nok bu seg på at det blir mindre tilgjenge og eit litt lågare tenestetilbod ei tid framover, sa Bjerkvik.