– Ungane våre er for viktige og vegen for farleg til at prosjektet burde vera gjenstand for eit politisk spel

Innspel til planprogram for ny kommuneplan i Kvinnherad kommune

Ænes og Mauranger bygdalag (ÆMB) syner til offentleg ettersyn av planprogram for ny kommuneplan i Kvinnherad kommune.

 

Me har følgjande merknader til planprogrammet:

Vekst og tenester i bygdene våre

Mauranger er ein utkant av Kvinnherad. Me er likevel stort sett nøgd med dei kommunale

tenestene, all den tid me har barnehage og skule i Sundal. For å oppretthalde tenester og

folketal er me likevel avhengig å få lagt til rette for fleire bustadar og ny næring. Me er

positive til at kommunen no utarbeider moglegheitsstudie for Mauranger. Me vonar det her

vil komme konklusjonar som kan gå rett inn i kommuneplanarbeidet. Dersom oppvekstsenter

forsvinn vil Odda kunne tilby oss tenester innanfor alle felt i kortare avstand enn det

Kvinnherad kan. Dette er særskilt tilhøvet når ein no ser at tenester som ungdomsklubb vert

foreslått sentralisert på Husnes.

 

Trafikksikkerheit

Sjølv om folketalet ikkje stig så aukar trafikken gjennom vår del av kommunen. Både Fv. 551

og Fv. 107 har vesentleg vekst i trafikken. Det merkar me som bur her godt. Det er særskilt

to område som er kritiske.

Farten gjennom Sundal er svært høg, sjølv om det er 50-sone. Ved oppvekstsenteret er det

ein uoversiktleg og kaotisk situasjon, med lite sikt og ingen tilrettelegging for borna som

dagleg går til og frå skulen.

Under folkemøte i Mauranger i 2017 overgjekk lokalpolitikarar og rådmann

kvarandre i alle tiltaka som skulle kome på plass i Mauranger. Spesielt gjaldt dette

trafikksikkerheitstiltak i Sundal. Der er ingen av lovnadane er følgt opp

Mellom Austrepollen og Nordrepollen finn me ein av dei mest rassutsette vegstrekningane i

fylket. Dette er skuleveg for born og unge både i Kvinnherad og nabokommunar. ÆMB

registrerer at det er nabokommunane våre som arbeider for å sikre vegen med tunnel.

Kvinnherad er på ingen måte i førarsete. All den tid prosjektet ikkje krev investeringar frå

Kvinnherad kommune er det uforståeleg at ordførar og andre ynskjer at Kvinnheradpakken

skal gjennomførast først. Ungane våre er for viktige og vegen for farleg til at prosjektet burde

vere gjenstand for eit politisk spel.

 

Strategisk styring gjennom kommuneplanen

ÆMB vonar planen vert eit reelt styringsdokument og ikkje ei samling av alle mogleg gode

intensjonar. Planen må prioritere. Val av hovudstrategiane attraktiv-frisk-grøn er positivt i så

måte. Ein er likevel heilt avhengig av at administrasjon gjev klåre råd og at politikarar har

visjonar ut over sin eigen kommunestyreperiode. Å skape ein attraktiv, frisk og grøn

kommune tek lang tid. Dei langsiktige strategiane må sikrast gjennom handlingsplan og

økonomiplan. Berre då kan ein få ei definert utviklingsretning i den nye kommunen.

Kommunale tenester og arealutvikling må her gå hand i hand.

 

Strandsone

Kvinnherad har mykje strandsone. I enkelte deler av kommunen er mykje nedbygd, i andre

deler særs lite. Mauranger er i den sistnemnde kategorien. Me vonar at

strandsonekartlegginga gjer reflekterte vurderingar av dette med fokus på dei ulike delane

av kommunen. Område som til no har vore “flinke” bør ikkje lide for at ein i andre delar av

kommunen ukritisk har privatisert store område.

Trafikklysmetodikken

Me er positive til at ein legg opp til “grovsiling” av innspela til arealdelen. Me meiner likevel at

dersom verdien av eit nytt utbyggingsareal er særskilt stort for ei bygd, så må dette vege

tyngre enn potensielt konfliktnivå. Me veit at slike areal kjem til å bli diskutert i Mauranger,

der tilgjengelege areal er svært avgrensa.

 

Tenesteyting i kommunesenteret Rosendal

Frå Mauranger til Husnes er det langt (60-70 min). Til samanlikning er det 12-20 min til

Odda. For ÆMB er det viktig at Rosendal er kommunesenter, ikkje berre i namnet. Dette

betyr at alle besøksintensive, kommunale tenester må vere til stades her. Då nye kulturskule

vart bygd på Husnes mista me i praksis eit svært viktig kommunalt tilbod til våre born. Odda

vert såleis stadig viktigare for oss. Her opplever me gode tenester i kort reiseavstand.

Utfordringa er naturlegvis at me i utgangspunktet ikkje har krav på tenester derfrå, som til

dømes kulturskule.

ÆMB registrerer no at det òg er eit ynskje om å sentralisere ungdomsklubbtilbodet i

kommunen til Husnes. Tilbodet i Rosendal har vore nytta av ungdomar i Mauranger i lang tid

og forsvinn i praksis med ei eventuell sentralisering. Dette vil vere svært negativt og

underbygge oppfatninga av at Mauranger vert bortprioritert.

 

Utvikling i kommunesenteret Rosendal

ÆNB er kritiske til at utvikling av kommunesenteret Rosendal ikkje er nærmare skildra under

“arealstrategi”, medan Husnes har hovudfokus. Husnes har eit befolkningsmessigt større

omland, men er praksis berre regionsenter for ein halv kommune. ÆMB er positive til at

regionale funksjonar kan leggjast hit, men Rosendal har utvilsamt størst potensiale for å

skape eit attraktivt kommunesenter. Rosendal er ein spesiell klang utanfor regionen som

manglar sidestykke. Her er det særpreg og stort potensiale for ny, reiselivsretta næring, samt

befolkningsauke. Også i høve til attraktiv sentrumsutvikling har Rosendal fortrinnet, med sitt

tette sentrumsområde innramma av ein heilt særprega naturlandskap. Desse styrkane må

vidareutviklast, samstundes som ein legg til rette for regionale funksjonar på Husnes. ÆNB

ynskjer at dette vert lagt vekt på i kommuneplanarbeidet.

 

Av

Kristian Bondhus-Jensen

for Ænes og Mauranger Bygdalag

Sundal, 09.02.19

 

[gravityform id="11" title="true" description="true"]