Ungdomsklubb og Milk-kurs

I september startar det opp ungdomsklubb i bedehuset i Rosendal i regi av soknerådet, Indremisjonen i Rosendal og prest Kjersti B. Boge.

– Kvar andre veke står dørene opne for ungdomar frå 14 år og eldre. Det vil bli mogleg å kjøpa seg litt mat, samtalar rundt borda, speling i kjellaren, andakt og song kvar gong. Etter kvart håpar vi at vi skal få til eit ungdomsstyre, opplyser sokneprest Kjersti Brakestad Boge.

I tillegg vil det ein gong i månaden verta tilbod om Milk-kurs som er eit minileiar-kurs for ungdomar som er eldre enn konfirmantane.

– Det er eit kurs over åtte samlingar, der ein lærer om korleis ein skal bli trygg i rolla som leiar. Det er KFUK-KFUM som har utarbeida kurset og det er svært godt. Kvar samling byrjar med mat, før ein tek til med opplæringa, fortel Boge.

Kurset startar opp i midten av oktober. Meir informasjon og påmelding finn ein på nettsidene til Kvinnherad kyrkje.