Utdanna trenarane

12 lokale fotballtrenarar brukte helga på å vidareutdanna seg i faget. Kurshaldar var Eivind Nissestad frå Trio.

Delkurs 2 i C-lisenskurset stod på timeplanen for dei engasjerte trenarane onsdag, laurdag og søndag i Rosendal Samfunnshus. Eivind Nissestad har gått på trenarrettleiarkurs hjå Hordaland fotballkrins og stod for undervisninga. Hovudtema var trening av 9 og 10-åringar. – Fokus har vore på øvingar og korleis trenarane skal opptre som rollemodellar. Og så har vi diskutert meistringsorientert læremiljø kontra resultatorientert. Vi har vel konkludert at meistringsorientert klart er å føretrekkja for denne aldersgruppa, fortalde Nissestad då Grenda stakk innom.

11 av deltakarane representerte Rosendal Turnlag, men også Trio sin ferske A-lagstrenar Aleksander Ekeland deltok. Han var svært nøgd med utbytet.

– Vi har hatt mange diskusjonar, og andre sine meiningar er det godt å ta med seg, sa han, og følte han kan gjera seg nytte av kunnskapen også overfor vaksne spelarar.

 

Sjølvtillit

Nissestad opplyste at føremålet med kurset er å løfta nivået i Kvinnherad.

– Det er ikkje noko gale med personar som ikkje har gått på kurs, og vi er avhengige av alle trenarane og foreldra som stiller opp. Men kan ein gje dei formell kompetanse, så er det ein vinn-vinn-situasjon for alle partar, slo han fast.

Ungdomsleiar Arvid Nes i RT var kursansvarleg. Han oppmodar folk til å melda seg på komande trenarsamlingar.

– Vi ynskjer å gje spelarane eit skikkeleg tilbod, ikkje berre ein ball å triksa med. Då er det godt for trenarane å bli fagleg sterkare, det gjev dei også større sjølvtillit i rolla si. Målet er at alle trenarane i RT skal gjennomføra kurset, sa Nes.