Uttale frå klubbane – Kvinnherad Energi og Kvinnherad Breiband

– Vi meiner det er ein tryggleik å ha eit solid energiselskap og breibandselskap som har motiverte arbeidstakarar i nærmiljøa der feila oppstår, skriv klubbane i Kvinnherad Energi og Kvinnherad Breiband.

 

Klubbane har i samråd vedteke å sende ein felles uttale i samband med eigarskapsmeldinga.

Kvinnherad Energi og Kvinnherad Breiband er i dag ein god arbeidsplass og to sunne verksemder som leverer tenester til innbyggjarane i Kvinnherad. Vi forsyner innbyggjarane med straum og breibandtenester i heile den vidstrekte kommunen, og held linjenettet godt ved like slik at oppetida for straum og breiband blir så høg som mogeleg. Kvinnherad Energi har òg eigen kraftproduksjon i Hattebergsdalen Kraftstasjon i Rosendal, og har driftsansvar for Valen Kraftverk. Straum er ein viktig del av livsnerven, og breiband er blitt ein sjølvsagt del av kvardagen både i arbeid og fritid.

Vi er 40 tilsette som er stolte av jobben vi gjer, både inne på kontor og ute i allslags vêr. Og ver er det mykje av her vi bur. I krisesituasjonar stiller vi opp og syt for at utetida på tenestene blir så kort som mogeleg. Vi har vaktordningar i begge selskapa, og det ligg i ryggmargen på oss tilsette at vi stiller opp for kundane også utanfor normal arbeidstid. Dei som kjenner oss veit at når krisa oppstår, forlét vi familieselskapet eller treninga for å få straumen på att så fort som mogleg. Dette ligg i ryggmargen til kvar og ein av oss. Vi er stolte av jobben vår, og vi yt gjerne litt ekstra for at våre gode naboar og sambygdingar skal få straumen og breibandet attende så fort som mogleg.

Vi har eigne hogstfolk som syt for gode, breie linjekorridorar slik at det vert minst mogleg skade ved trefall og sterk vind. Dette er med på å oppretthalda den gode oppetida vi har. Det er høgt fokus på helse, miljø og tryggleik i kvardagen for at alle våre skal kjenne at dette er ein trygg og god arbeidsplass. Dette er noko som vi tilsette har med oss kvar einaste dag når vi går til jobben.

Kvinnherad Energi og Kvinnherad Breiband genererer 40 arbeidsplassar, inkludert 2 læreplassar, og er av betyding for sysselsettinga i kommunen, og ikkje minst er vi skatteytarar, som bidreg med våre skattekroner til kommunebudsjettet.

Kvinnherad Energi har sidan det vart eige AS i 1993 bidrege med nærare 200 millionar i utbytte til Kvinnherad Kommune. Kvinnherad Breiband har dei siste åra gått med overskot og deler ut utbyte til eigarane. Dette har vore gode og sikre inntekter til kommunen.

Vårt ynskje og signal til politikarane og administrasjonen i Kvinnherad er at ein beheld eigarskapet i desse to gode verksemdene, slik at vi framleis kan yte gode tenester og vere ei god inntektskjelde for Kvinnherad Kommune.

Det kan være lett å la seg freiste til å selje/fusjonere selskapa for ein kortsiktig gevinst for å bøte på ein trengt kommuneøkonomi, men ein treng ikkje sjå langt for å sjå konsekvensane det har fått andre stader der dette er gjennomført. Der lokale kraftselskap er lagde ned, har og lokale arbeidsplasser forsvunne og råderetten over eigen kritisk infrastruktur er svekka. Vi noterer oss og at det er ein politisk prosess der myndigheitene ser på utjamning av nettleiga. Det og fleire store kundar på veg inn i nettet som vil gje eit positivt utslag på nettleiga. Vi minner om at nettleiga vart satt ned igjen av Kvinnherad Energi frå årsskiftet.

Kvinnherad Energi har godt samarbeid med Hardanger Energi og Odda Energi, og saman har vi oppretta «lokalkrafta», ein straumallianse mellom dei lokale kraftleverandørane. Formålet med alliansen er å ta vare på lokal kompetanse, arbeidsplasser og lokalsamfunna. Ein nasjonal kraftleverandør med lokal forankring. Det er oppretta ei eiga nettside; lokalkrafta.no.

I større selskap går feilmeldingar til sentrale feilmottak og arbeidet ute i nettet blir ofte utført av entreprenørar som har slike jobbar på anbod. Ein situasjon der lokalkunnskapen og eigarskapen til straum og breibandnettet blir meir perifer, uroar oss.

I dag er vi 40 tilsette som bur rundt i Kvinnherad, noko som medfører kort responstid når eventuelle feil oppstår. Vi meiner det er ein tryggleik å ha eit solid energiselskap og breibandselskap som har motiverte arbeidstakarar i nærmiljøa der feila oppstår.

Vi er klar over at det må gjerast grep for å effektivisera drifta, men vi meiner at Kvinnherad Energi er robuste nok til å ta dei endringane som må til for å sikre effektiv og lønsam drift i framtida.

Vi ynskjer at politikarar og andre gode innbyggjarar i forsyningsområdet vårt skal vita at vi er motiverte, og gler oss til å gå på jobb kvar dag og ynskjer å bidra til at bedrifta skal kunna oppnå gode resultat også i framtida. Vi ynskjer at de tenkjer på dette, i denne prosessen som no er i gang. Vi er menneska i selskapet som er ein vesentleg del av samfunnsmaskineriet i Kvinnherad Kommune, og det ynskjer vi gjerne å forsetja med.

 

Dimmelsvik 29. januar 2019

Klubbane for tilsette ved Kvinnherad Energi og Kvinnherad Breiband; El&IT, NITO, Negotia.

[gravityform id="11" title="true" description="true"]