Varaldsøy har endeleg ferjesamband igjen

Seint fredag kveld vart ferjekaien på Varaldsøy opna for trafikk igjen.

Etter at MF "Hordaland" torsdag morgon kom langt ut av kurs og skrapte nedi sjøbotnen ved Hestvikodden, vart det dramatisk då ho fortsette mot Varaldsøy med ei om lag 3 meter lang og 5 cm brei flenge i skroget, 2 meter under vassoverflata. Heldigvis greidde ferja å koma seg til kai, slik at passasjerar og bilar kom seg på land. Men der vart ho liggjande heile torsdag og fredag, slik at Varaldsøy vart utan ferjesamband.

Klokka 22.45 fredag kveld meldte Norled at ferjekaien igjen er opna og at det er normal drift i ruta. MF "Hordaland" er laurdag klokka 11.00 framleis ved Varaldsøy, men er taua bort til ein annan kai.