Varm haustmånad

Ein skulle ikkje tru det var mogleg, men september var faktisk to grader varmare enn juni!

September gav ingen dum start på hausten 2015. Det regna ein del mindre enn tilsvarande månad i fjor, det var mange nedbørsfrie dagar og temperaturen var uvanleg høg.

For å ta det fyrste fyrst; nedbøren. Jamt over kom det 20-30 millimeter mindre regn enn i fjor. Men i Matre og Omvikdalen er skilnaden endå større. Og for ein gongs skuld fekk ikkje Matre mest i målerøyret. Husnes slo til med 129,2 mm og mest regn i september, knipent føre Ølve på 125,5 mm. Minst nedbør fekk Rosendal. På Vang vart det berre registrert 88,3 mm.

– Det kom mindre nedbør i september i år samla enn den 14. september 2005, då ulukka i Hatlestad terrasse (utanfor Bergen) skjedde, fortel Knut Johannes Helvik i Kvinnherad Elektro.

 

Sommarøya

Totalt etter ni månader ligg imidlertid 2015 framleis godt over fjoråret når det gjeld nedbørstala.

Varaldsøy er verkeleg sommarøya i Kvinnherad. Førre månad slo dei til med heile 20 nedbørsfrie døger. Men også resten av kommunen hadde mange dagar utan behov for regnklede. Historisk sett gav 1998 den beste september-månaden med sine 65,7 mm nedbør. Verst var 1975 med heile 446,8 mm. Dette ifølgje tala til Hydro Husnes.

 

På 20-talet

Temperaturane var høge til å vera september. Alle stasjonane våre nådde godt opp på 20-talet på det varmaste, og ingen av dei var kaldare enn 6 grader. Aller varmast var Varaldsøy med sine 22,4 grader. I Rosendal vart det målt eit snitt for månaden på 13,3 grader. Ei samanlikning mot juni i år gjev eit oppsiktsvekkande resultat. Då var nemleg snittet berre 11,4 grader, altså 1,9 grader lågare!

– September hadde fire dagar over 20 grader og ti dagar over 19 grader, opplyser Knut Johannes Helvik.

Også i september i fjor var snittet høgt, då med 13,2 grader. Hittil i år melder Rosendal om eit gjennomsnitt på 9,5 grader, mot 11,2 tilsvarande periode i fjor. Uskedalen har også 9,5 grader i snitt hittil. I fjor var talet 11,26 grader og i 2013 var det berre 8,61.

 

Sjå statistikken frå våre ti vêrstasjonar i dagens papirutgåve av Grenda.