Vart evakuerte på grunn av rasfare

To leilegheitskompleks i Porsvik vart evakuerte denne veka på grunn av fare for steinras frå ei vegfylling. Bakgrunnen er nye vurderingar etter raset 7. mai.

Det har vore fleire møte mellom ulike faginstansar, kommunen og politiet før ein tysdag avgjorde å be bebuarane i to leilegheitskompleks, eitt med fire leilegheiter og eitt med to, om å flytta ut av husværa sine til fagmiljøet og kommunen får avklart situasjonen. Den 25. juni vart det først avgjort å ikkje evakuera husa, men to nye rapportar frå Norconsult konkluderer med at ein ikkje kan garantera at ikkje fleire steinblokker vil falla ut av skrenten bak husa.

– Dette er ei vanskeleg, skjønsbasert vurdering, men vi vel å be folk flytta ut for å vera på den sikre sida, seier rådgjevar i Kvinnherad kommune Pål Strand.

Han vil ikkje overdramatisera situasjonen, men fortel at ein må finna ut kva ein må gjera for å betra situasjonen. I første omgang vart bebuarane bedne om å forlata heimane sine i 48 timar, og politiet har sett opp sperreband kring husa.

– Det betyr at det ikkje er lov å bevega seg innanfor desse, seier politioverbetjent Stig Dagfinn Tveiten.

 

Friviljug

Politimannen fortel at alle bebuarane flytta friviljug, og at det aldri vart noko tema å tvangsevakuera nokon. Bebuarane er no innlosjerte på Rosendalstunet eller privat.

Torsdag morgon avgjer kommunen og politiet om evakueringa vert utvida, og deretter vert det halde eit informasjonsmøte på rådhuset i Rosendal for dei involverte.

– Det kan bli trong for å forlenga evakueringa for å vurdera nærare kva ein skal gjera på kort sikt. På lang sikt må det gjerast utbetringar med vegen, men slike tiltak kan ta fleire år. No må vi først finna ut kva vi skal gjera i første omgang, seier Strand.