Vart liggjande skadd i ni timar

Etter at dei tre steinras-skadde klassevenninnene vart frakta ned frå fjellet, vart den siste jenta liggjande skadd i det kalde fjellet i heile ni timar.

– I går rundt klokka 22.00 vart den siste personen henta ut ved Dyrrinda i Tveitedalen. Det var også her hjelpemannskapet på Utåker-sida hadde etablert seg. Jenta vart bore frå ulykkesstaden i fjellet og ned i eit område kor det var mogleg å koma til med helikopter, seier lensmann Jan Fosse til Grenda.

Jenta vart så frakta til Stavanger sjukehus for nærare undersøkingar av brotskadane ho fekk som følgje av raset.

 

Vart boren ned

Politiet fekk tysdag føremiddag melding om at fire jenter var skadde i fjellet etter å ha fått steinar over seg. Turfølgjet på 22 elevar og to lærarar frå villmarkslinja ved Sauda vidaregåande, var på klassetur frå Fjellandsbø, inst i Uskedalen, mot Tveitedalen ved Utåker. På Litlenuten, i eit område med mykje lause steinar, kom dei ut for raset.

– Vi fekk melding om dei skadde jentene klokka 12.21. Det vart då sett i gong ein redningsaksjon, der vi kjapt fekk henta ut ei av jentene. Men tilhøva gjorde jobben med å henta ned resterande tre personar vanskeleg, seier Fosse.

Ein lege og ein mann frå redningshelikopteret vart heist ned til turfølgjet då fyrste personen vart henta ut. Dei skadde jentene hadde difor god oppfølging heile vegen. Grunna tett tåke og lågt skydekke var det umogleg å få henta dei ut. Hjelpemannskap i form av frivillige kjentmenn og Røde Kors bidrog i redningsaksjonen, og fekk bore ned ei og ei jente dit

helikopteret kom til.

– Dei skadde jentene vart borne ned av hjelpemannskap dit redningshelikopteret klarte å landa. Alle jentene fekk brotskadar, men var etter meldingane ikkje livstrugande skadde. Det at det tok så lang tid som det gjorde i dette tilfellet, der ei av jentene vart liggjande skadd i nærare ni timar, kan vera problematisk i lengda, seier Fosse.

Dei skadde vart frakta til høvesvis Haukeland-, Stord- og Stavanger sjukehus for vidare behandling av brotskadane.Resten av turfølgjet reiste heim til Sauda.

 

Må vera varsame

Fosse er klar på at folk som skal ut på lengre turar, sjølv om dei har gått turen mange gongar før, må ta betre risikovurderingar før dei legg ut på tur.

– Det må vera lov å stilla spørsmål ved vurderingane folk gjer før dei legg ut på fjelltur. Ein må sjå an vêrtilhøva og lytta til vêrmeldingar, for så å ta vurderingar ut frå det. Er det meldt vind og vått vêr, er faren større for at ein kan skli og skada seg. Det vert også kjempestore utfordringar med å koma seg inn med redningshelikopteret når vêret er slik som på tysdag. Generelt sett så ser vi at risikovurderingane som vert tekne i forkant av lengre turar ikkje er optimale, seier han.

– Eg vil samtidig peika på at det var mange som gjorde ein veldig god jobb. Røde Kors, dei frivillige og andre hjelpemannskap gjorde ei heroisk innsats heile aksjonen gjennom, og fortener skryt, legg Fosse til.