– Veg gjennom Rosendal

Eg har fleire gonger i sommar hatt gleda av å både gå og køyra gjennom Rosendal sentrum. Også NRK har vore der med kamera og reporter. Innslaget i Vestlandsrevyen frå Skålagata og Guddal er den beste turistreklamen eg har sett på lenge, ja, kanskje verdt fleire hundre tusen kroner, om ein set det inn i eit slikt perspektiv.

Men ikkje alt er idyll i rosendalsbygda, slik eg ser det. Då tenkjer eg først og fremst på straumen av bilar, små og store, som passerer gjennom gågata heile tida, like inntil dei koselege uteplassane og butikkane som finst der. Eg sit der ikkje ofte, men reagerer kvar gong det kjem ein stor trailer forbi. Ein ting er motorduren, noko anna er eksosen dei spyr ut medan folk sit og kosar seg langs fortaua. Rosendal er spydspissen i reiselivssamanheng i Kvinnherad, og med aukande trafikk gjennom Skålagata vil desse problema berre bli større og større.

Allereie då eg var liten gut på 1950-talet, var det snakk om at vegen skulle leggjast utanom sentrum, på oppsida av Skålagata, endåtil trafikken på den tida var eit minimum av det han er i dag. I dag er dette truleg vanskeleg eller umogleg å få til på grunn av jordvern og anna. Dessutan er byggefeltet på Jensajorda og den nye gravplassen i vegen for ein gjennomgangstrasé der. Jorda i Rosendal er også langt på veg verna til evig tid, noko tomtemangelen i bygda er eit bevis på. Men det er ei sak for seg.

Kva er så alternativet til i det minste å få vekk tungtrafikken gjennom Rosendal sentrum? Er det ein idé å la trailerane køyra gjennom Skålafjæro? Eller kanskje ein tunnel under hovudgata, slik vi ser mange andre stader i landet vårt?

Rosendal Utvikling, Visit Rosendal og andre konstruktive krefter bør i alle fall diskutera problematikken, kanskje òg kalla inn til folkemøte når trafikken stilnar etter enda sommarsesong. Som vi veit går det minst 20 – 30 år å få gjennom store vegprosjekt her i landet, så det er berre å setja i gang diskusjonen – og planlegginga.

 

Lukke til!

 

Av: Kristian Hus