Vegsikring i Herøysundet

I samband med at vegen frå kaien i Herøysundet og opp ved Helvik skal omklassifiserast, føregår det no sikring av nokre bergnabbar.

To karar frå Mesta fjellsikring i Leikanger har denne veka nytta hammar, spett og boremaskin for å auka tryggleiken langs ei smal vegstrekning i Herøysundet. Bakgrunnen er at vegen, som i dag er eigd av fylkeskommunen, skal overtakast av Kvinnherad kommune.

– Fylket førebur ein overleveringsprosess til kommunen. I den samanheng stiller kommunen visse tekniske krav til standarden på vegen, mellom anna når det gjeld sikring, sikt, drenering, dekke og oppbygging. Dette er tilhøve som er regulert av veglova, opplyser Ivar Kåre Døssland i Kvinnherad kommune.

Parsellen frå krysset ved Slangeservice og ned til kaien er allereie i kommunal eige.