Vêromslag kan gi spinnglatte vegar
I Rogaland, Hordaland og Sogn og Fjordane er det frå fredag og inn i helga venta regn som frys på bakken. Vegvesenet oppmodar til å køyra forsiktig.
Mange kuldegrader blir avløyst av regn og plussgrader. Det blir store lokale forskjellar i dei tre fylka. Trafikantar bør køyra forsiktig og hugse på at vegane kan vera svært glatte sjølv om det er plussgrader og regn i lufta.
Artikkelen held fram under annonsen.
Nedbøren frys
Vêrmeldinga syner omslag til mildver. Etter ein langvarig kuldeperiode kan dette bety vanskelege køyreforhold.
– Mykje kulde er lagra i bakken, som gjer at nedbøren frys når den når vegen, melder Tore Bergundhaugen på trafikksikkerheitsseksjonen i Statens vegvesen.
Det blir nok store lokale forskjellar, og det glatte føret kan vara heile helga.
– I sør og nærast kysten seier vêrvarsla sludd og regn, litt lengre innover i landet seier varsla snø som går over til sludd og regn etter kvart, seier Bergundhaugen.
Salting av vegane er ikkje noko god løysing slik tilhøva er no.
– Når så mykje kulde er lagra i vegane, har salt mindre effekt. Kjem det ein del regn i tillegg blir saltet vaska vekk. Då kan vegane igjen frysa til, forklarer han.