– Vert ikkje festival i same form neste år

Eldsjelene bak strikkesuksessen i Omvikdalen har bestemt seg for at det ikkje vert Strikk på Dalen 2020, i alle fall ikkje i same form som dei to føregåande åra.

– Vi veit ikkje om det vert festival neste år, men om det vert så vert det eit anna konsept enn det vi har hatt til no, seier Bente Haugen frå Omvikdalen bygdekvinnelag.

Det vart bestemt på evalueringsmøtet torsdag i førre veke.

– Vi har hatt to suksessar no, og er veldig nøgde med at det har slått så godt an som det har gjort. Vi har fått mykje god støtte frå både styret i bygdekvinnelaget og dugnadsfolk som har stilt opp, så det ligg ingenting negativt bak det, men det går med mykje tid i å arrangera ein slik festival, seier Haugen.

Planlegginga til årets festival starta arrangørane med så tidleg som i mai i fjor, og har jobba med det jamleg fram mot festivalhelga. Men sjølv om dei no har bestemt seg for å ikkje gå på ein festival i same dur som tidlegare, held dei døra for noko liknande framleis litt på gløtt.

– Vi kjem til å samla oss i august ein gong for å sjå om det er mogleg å få til noko anna, ein strikke dag for eksempel. For det er mange flotte tankar rundt dette med strikking, og interessa er stor. Så vi får sjå kva vi landar på i august, seier Bente.