– Vi treng meir kunnskap

Sidan det på Vegard Bjørnevik sitt initiativ skal tilrettleggast for kjernekraftdebatt i Kvinnherad ynskja Grenda å gi ordføraren høve til å kome med nokre kommentarar om kva han og forsåvidt partiet hans meiner om kjernekraft. Bjørnevik er tydeleg på at han har to roller i saka. Det er både som ordførar og som Høgre-politikar. Han peikar uansett på eit moment som det viktigaste no.

– Vi treng å få kunnskap om kjernekraft for å kunne ta ei avgjersle. Det finst allereie fleire kommunar som har byrja konsesjonsprosessar for utbygging av kjernekraft, så det vert spanande å følge med på, seier Bjørnevik.

Kjernekraftutvalet

Energidepartementet kom i april med ein rapport frå kjernekraftutvalet om kva som kan vere fordelar og ulemper med kjernekraftutbygging i Noreg. Utvalet var leia av Kristin Halvorsen som har vore tydeleg kritisk til kjernekraft ved fleire høve i karrieren hennar før arbeidet tok til.

Rapporten sin konklusjon ser ut til å vere at det å bygge ut kjernekraft i Noreg vil vere ein lang og dyr prosess, samtidig som det å avkommisjonere eit kjernekraftverk er eit svært omfattande prosjekt. Rapporten seier at de kan ta så lang tid som 20 år å skru av, handtere avfallet og rive byggmassen etterpå. Samtidig seier rapporten at ein burde jobbe med å tileigne seg kunnskap om problematikken for å vurdere om dette for eksempel er eit betre alternativ enn vindmøller.

Vegard Bjørnevik tykkjer at kjernekraftuvalet snakkar litt imot seg sjølve med rapporten.

– Det vil jo uansett ta lang tid å samle kunnskap og å førebu eit slikt prosjekt, seier ordføraren som håpar at kommunane gjev tydelege svar på høyringa som er ute frå staten om rapporten.

Treng meir kunnskap

Thea Vaage (Ap) tykkjer det er ein spanande diskusjon som no kjem, men er tydeleg på at det enda er eit spørsmål ein samlar kunnskap om. Ho trekk også fram kjernekraftuvalet sin rapport som framleis er ute på høyring. Ho påpeikar også at ein treng meir kraft framover, men er ikkje sikker på at dette er løysinga.

– Vi ventar på meir kunnskap, seier Vaage.

Veronica Thorkildsen Thorsen (Sp) viser til at partiet hennar ikkje har kjernekraft som hovudpunkt i politikken, og fokuserer på vasskraft. Ho legg til at det er ein del ting som må på plass dersom ein skal ha det lokalt.

– Vi har ikkje noko imot å lære meir om kjernekraft, men debatten kjem kanskje litt tidleg med tanke på at vi enno ikkje veit nok om avfallshandteringa, fortel Thorsen som er gruppeleiar for Senterpartiet i Kvinnherad.

Nei til vindmøller, ja til kjernekraft?

Annemor Ekeland har vore ei sterk stemme i kampen mot vindmøller i Kvinnherad kommune. Kjernekraftdebatten ynskjer ho derimot velkommen, sjølv om det er delte meiningar om temaet i Motvind Norge som kjempar mot vindmøller til vanleg.

Innad i organisasjonen går meiningsdelinga ifølge Ekeland på at det å gå inn for kjernekraft er å anerkjenne at Noreg treng meir kraft, noko som strider mot eit av premissa som ligg til grunn i vindmølledebatten.

Ein aktør i næringslivet som slukar mykje kraft er datasenternæringa. Annemor Ekeland er tydeleg på at når det gjeld datalagring treng ein det, men lurar på kva ein skal med at utanlandske aktørar lagrar data på billegare norsk straum.

– Vi har allereie åtte gonger meir datalagring enn det vi treng i Noreg, og så øydelegg det naturen, seier Ekeland.

Ho peikar på det viktigaste er at ein reserverer nok straum til å bevare smelteverksindustrien i Noreg. Til slutt rettar ho ein honnør til ordføraren som tek opp tema.

– Vi har ein framsynt ordførar som gjer ein fantastisk jobb!