Vidarefører smitteverntiltak til januar

Regjeringa vidarefører dei nasjonale smitteverntiltaka til siste halvdel av januar.

– Vi ser at dei nasjonale tiltaka har hatt effekt, og det ser ut som smitten har gått ned. Det er veldig bra. Samtidig er situasjonen framleis ustabil, og det er nødvendig å halda på dei nasjonale smitteverntiltaka lenger for å unngå at vi startar det nye året med ei ny smittebølge og nye innstramingar, seier helse- og omsorgsminister Bent Høie.

På bakgrunn av råd frå Helsedirektoratet og Folkehelseinstituttet har regjeringa vedteke å vidareføra dei nasjonale smitteverntiltaka med nokon mindre justeringar.

– Det er nødvendig å sjå kva betydning juleferien har på smittesituasjonen før regjeringa kan ta stilling til endring i tiltaka. Difor vert dei i første omgang vidareført til andre halvdel av januar, står det å lesa i ei pressemelding.

 

Regjeringa gjer følgande mindre justeringar:

- Råd om ekstra avstand ved besøk til personar i risikogruppe vert også retta mot dei som har vore i område med mykje smittespreiing dei siste ti dagane.

- Råd om å unngå unødige reiser innanlands inkluderer råd om meir avstand ved reiser frå område med stor smittespreiing, og at smitterisiko kan reduserast ved å vera meir nøye på avstand og ikkje delta på sosiale samlingar ti dagar før ein reiser.

- Råd til kommunane som har vidaregåande skular og ungdomsskular på raudt nivå understrekar at kommunane jamleg må vurdera om smittesituasjonen tilseier at nedskalering til gult nivå er forsvarleg. Vidaregåande skular og ungdomsskular i kommunar som opplever kraftig smittevekst, må vera førebudde på at tiltaksnivået kan bli raudt.