Vil byggja stort i Neslia
Einar Holsvik fortel at Neslia Øvre AS er klare til å byggja ut tomannsbustader straks dei får kjøparar.
– Her blir det bustader med panoramautsikt, smiler Holsvik som sit i styret for Rosendal Eigedom, som saman med Kvinnherad bygg har hand om byggjefeltet.
Holsvik fortel at folk anten kan kjøpa tomter og byggja sjølve, eller kjøpa ferdigteikna funkisleilegheiter på 140 rutemeter.
Artikkelen held fram under annonsen.
– Dette blir tomannsbustader med god plass, livslaupsstandard og tre soverom. Gjennom mange år har det ikkje vore tomter som dette å oppdriva, og yngre familiar kan gleda seg over at husa er godkjende i Husbanken – slik at ein kan låsa renta i 20 år og få avdragsfritt lån dei åtte første åra, seier Holsvik.
Neslia Øvre AS har arbeidd med prosjektet i 4-5 år, og brukt mykje tid på å planleggja og dokumentera på grunn av høge krav frå styresmaktene til rassikring, støyskjerming og liknande.
– Vi må også grava ned høgspentleidningar og laga ny skogsveg, og all dokumentasjon og planlegging har teke mykje tid. Men grunneigarane har vore svært velviljuge, så dei vil eg gjerne nytta høvet til å takka. No er vi klare til å annonsera både bustader og tomter over nyttår, seier Holsvik.
Han fortel at fleire allereie har teke kontakt for å høyra om prosjektet, så Svein Bjarte Veastad i Kvinnherad bygg har fleire interesserte på lista.