Vil starta opp Ung Husflid i Kvinnherad

Kvinnherad Husflidslag lurer no på om det er interesse blant born og unge til å lære seg ulike typar handarbeid. Dersom svaret er ja, håpar dei på oppstart etter nyttår.

For å lufte interessa er det først og fremst greitt å vite kva Ung Husflid er, og kva det inneber å melde si interesse.

Bente Rusten, som er medlem i husflidslaget, samt kunst og handverkslærar på Undarheim skule, skal vera ansvarleg for kursa og aktivitetskveldane. Ho fortel følgjande om kva dei ser føre seg:

– Det blir jo nesten som ein slags hobbyklubb, der ein kan lære seg å spikke, sy, veve, strikke og brodere. Tema for 2022 er «rundt bålet», og det er jo mykje kjekke ting ein kan gjera til dette temaet. Ein kan lage mat òg, seier ho.

Blir slik deltakarane vil det skal vera

Innhaldet og forma som Ung Husflid vil få i Kvinnherad, er enno ikkje heilt klart. Bente vil dessutan leggje til rette for at dei som deltek får vera med å bestemme kva aktivitetar dei skal ha. Truleg blir det samlingar annan kvar veke, eller ein gong i månaden, men også det må dei koma attende til.

– Det me ønskjer no er at dei som er interesserte i å bli medlem tek kontakt med meg innan utgongen av november, slik at me kan planleggje og bestille inn materiale og det ein har bruk for. Eit medlemsskap kostar 200 kroner, og då er alt av materiale og aktivitetar dekka, seier ho.

Ung Husflid er eit tilbod til born og unge mellom 9 og 26 år, som vert organisert av dei lokale husflidslaga. Her får borna læra seg grunnleggjande handverksteknikkar, og får utforska fleire materialer, i trygge omgjevnadar, med kyndige rettleiarar.

Bente tipsar til slutt om at Ung Husflid også har ei nettside med mange kjekke aktivitetar, denne har ho fleire gonger nytta seg av som kunst og handverkslærar.