Alt klart for Varden Opp

Laurdag 22. oktober inviterer Idrettslaget Ternen igjen til familiedag og motbakkeløp frå Skarveland skule til Varden som ligg 516 meter over havet.

– Vi er klare, veit du. Det blir mykje det same som i dei tidlegare utgåvene, med mange ulike aktivitetar for dei minste. Det blir bondesjakk på Skarvelandsstølen, aktivitetsløype, slakk line og andre aktivitetspostar på vegen, seier leiar i Ternen Gro Rusten.

For idrettslaget er det familien som står i fokus denne laurdagen. Men det blir sjølvsagt også konkurranseløp, både for liten og for stor.

–Vi ynskjer å flest mogleg ut og i aktivitet, så for oss i Ternen er det familiane som er viktigast. Det er ein familiedag. Vi gjentek òg suksessen frå i fjor med barnas varden opp. Dei spring då på likt med dei vaksne, men dei startar oppe på Skarvelandsstølen, seier Rusten.

I fjor var det Johannes Heien og Hildegunn Håland som kunne jubla over å vera fyrst av dei 33 deltakarane gjennom den 3,3 kilometer lange motbakkeløypa. Har du lyst til å måla krefter med dei, er det berre å snøra joggeskoa og stilla til start neste laurdag.

– Vi har flytta arrangementet til laurdagen, det på grunn av andre aktivitetar på søndagen, sluttar Rusten.