Amalie (15) og 58 andre ungdommar har budd på skulen den siste veka:
– Heilt fantastisk

Det er Ungdomsutvalet i Hordaland friidrettskrets som har stått bak sommarsamlinga i Rosendal, som varte frå 8. til 12. august.

Også tidlegare år har kretsen invitert til liknande samlingar, mellom anna i Bergens-området, men i år tok dei grep for å prøva å gjera samlinga meir inkluderande også for ungdom frå distrikta; nemleg ved å organisera felles overnattingsstad og base for alle utøvarane. 

– Hadde vi ikkje hatt eit alternativ om overnatting, er det mange utøvarar som ikkje hadde hatt høve til å pendla kvar dag. Det har vi også sett dei gongene vi har arrangert i Bergen. Vi opplever også at ungdommane blir ekstra godt kjende når dei deler rom og måltider. Kjempesosialt, vurderte ei av dei i alt sju instruktørane, Oda Myklebust då Grenda stakk innom Rosendal ungdomsskule for ein prat tysdag.

– Vi er veldig takksame for skulen og kommunen for lånet, la ho til.

Godt oppmøte

Påmeldinga hadde vore god med 59 ungdommar i alderen 12 til 15 år, og med ei solid geografisk spreiing frå heile Hordaland. Tre ungdommar frå ulike bygder i Kvinnherad deltok også. 

– Vi har hatt langt betre påmelding i år samanlikna med tidlegare, sa instruktør Emelia Tveitå.

I løpet av veka har det vore både fagleg påfyll og kjekke fellesaktivitetar som fisking, turar og putball. 

– Siste kvelden blir det også talentshow, det blir nok høgdepunktet for min del, supplerte instruktør Josué Kongolo med eit lurt smil.

Han meinte at for friidrettsutøvarar spesielt, er det viktig med sosiale samlingar. 

– I friidrett er det eit stort fokus på individet, men her får ungdommane ein sjanse til å oppleva ei lagkjensle.

Han fekk støtte frå medinstruktør Brita Mehl Lode. 

– Det er veldig mange av utøvarane som kjem frå små klubbar der dei er få på trening, så slike samlingar er verdifulle for å bli kjent med fleire i miljøet, samt for å skapa engasjement for idretten vår, sa ho.

Med ei bestemor frå Rosendal har Mehl Lode tilbragt mykje tid i bygda, og håpa elles at det ville bli tid til ein tur innom Baroniet. 

– Ein kan nesten ikkje ha vore i Rosendal utan ein tur dit. 

– Heilt fantastisk

Amalie Husebø (15) frå Bergen var blant dei som hadde hatt nokre fine dagar i Rosendal. Til vanleg driv ho med hekk og høgde, men hadde fått prøva fleire andre greiner under samlinga. 

Det var derimot ikkje høgdepunktet frå veka hennar, kunne ho røpa.

– Eg har fått mange nye venner og har opplevd eit godt samhald. Alle har vore snille med kvarandre og det har rett og slett vore heilt fantastisk, kunne ho fortelja svært så entusiastisk.