Bronse også til Rosendal/Uskedal!

OPPDATERT: Rosendal/Uskedal sine gutar 15/16 år kunne ikkje vera verre enn 14-åringane til Halsnøy. Kvittrøyene tok ein sikker siger i sin bronsefinale fredag føremiddag. - Dette er så fortent for gutane, seier trenar Romar Skeie Olsen.

Rosendal/Uskedal G15/16 (7-ar fotball) møtte Bergsøy i bronsekampen. Bergsøy tok leiinga tidleg i fyrste omgang, men nærare pause så utlikna Jonatan Eskeland. Etter eitt minutt i 2. omgang sytte Tord Guddal for 2-1, og mot slutten av kampen auka same mann til 3-1. Heile Vipps-laget og mange andre frå Rosendal og Uskedal kunne jubla for ein velfortent og knallsterk bronsemedalje.

- Dette følest veldig godt, og det er så fortent for gutane. Dei har spelt utruleg bra, stått på, og halde ut betre enn motstandarane i kamp etter kamp, seier trenar Romar Skeie Olsen.

Han fortel at Rosendal/Uskedal starta best og pressa på, men i staden var det Bergsøy som scora på eit brassespark etter 7 minuttar.

- Då blir vi litt stressa og får ikkje heilt taket på det. Men etter pause har vi full kontroll. Samstundes er Ola (Hunstad) "outstanding" i mål. Bergsøy får ein del kontringar, men dei reddar han. Han er heilt rå, og utan Ola er det ikkje sikkert vi hadde vunne. Han er dagens mann, seier trenaren, som legg til at keeperen også var skada, utan at det affiserte nemneverdig.

Romar Skeie Olsen synest bronsen smakar bra, sjølv om det nesten vart finale.

- I dag smakar bronsen utruleg godt. Klart at gutane hadde lyst på finale, men i går var vi ikkje heilt på hogget og kom ikkje opp på det nivået vi plar vera. Dessutan var Førde svært gode, seier han.

Gutane skal no opp og sjå jentelaget spela finale i B-sluttspelet. Men dei har også følgd med på prestasjonane til Halsnøy.

- Eg synest det er heilt fantastisk at Halsnøy har fått to bronsemedaljar. At Kvinnherad fekk tre bronsemedaljar i A-sluttspelet er berre heilt enormt, og så må vi ikkje gløyma jentelaget som er i finalen i B-sluttspelet, slår Olsen fast.

Vi gratulerer klubb, spelarar og lagleiarane Romar Skeie Olsen, Atle Skåla, Petter S. Boot og Viljar Hatteberg Sætren!