– Det blir ei oppleving
Cupfinale, leiarseminar, Nikken-prisen og eit køyr utan like. Det blir ei helg for historiebøkene for Arvid Nes.
– No skal eg heim og pakka resten, seier ein nyfrisert Arvid Nes til Grenda.
Det dagen før avreise til hovudstaden og dei siste tinga må ordnast. Haukeliekspressen skal ta han til Oslo. Fotballforbundet har innkvartert han på hotell i tilknyting til cupfinalearenaen. Programmet dei neste dagane kan ta pusten frå nokon og ein kvar.
Artikkelen held fram under annonsen.
Uføreseieleg
Fredag er det leiarseminar på Ullevaal, der dei tre nominerte til Nikken-prisen skal presenterast. Motstandarane, om ein kan kalla dei det, er frå Troms og Oslo. På laurdag er det først sett av tid til cupfinalen for kvinner, før dei nominerte skal på middag på ærverdige Ekebergrestauranten. Sundag er det cupfinale for herrar, med utdeling av prisen i pausen i oppgjeret mellom Sarpsborg og Rosenborg. Fotballforbundet tar rekninga på alt for Arvid Nes denne helga.
– Eg prøver å bu meg på det meste, men eg reknar med det er mykje uføreseieleg som kjem denne helga. Det blir nok ei av dei større helgane i livet dette, noko eg vil hugsa og som vil setja varige spor, enten eg vinn prisen eller ikkje, slår han fast.
Tv-innslag
I førre veke følgde eit tv-team Arvid Nes i fem timar. Det skal enda i eit halvanna minutt langt tv-innslag som truleg blir vist i løpet av cupfinalesendinga.
– Det byrjar å gå opp for meg kor stort dette kan bli. Gjennomslagskrafta på tv er ganske stor. Eg prøvde å få inn mykje om bygda og kommunen då dei intervjua meg, men kva dei tar med i innslaget anar eg ikkje.
Artikkelen held fram under annonsen.
– Har du planlagt kva du skal seia viss du vinn?
– Nja, eg må ta mykje på sparket. Ein må vera seg sjølv, noko anna går ikkje, meiner han.
Arvid Nes har hatt gode opplevingar i hovudstaden før han, og mellom anna vore vitne til Rosendal-medaljar i Norway Cup. Vinn han Nikken-prisen, tar det nok kaka.
– Å få representera klubben, bygda og kommunen er det viktigaste. Og berre det å vera nominert er stort i seg sjølv. Men det hadde smakt med ein pris, sluttar han.