Eit steg nærare cupfinalen

Etter å hå slått Kjetil Berge og Sandefjord 2-1 og på hovudet ut av cupen, er det no berre Strømsgodset som kan stoppa Ørjan Røyrane og Kongsvinger i å gå heile vegen til Ullevaal.

– Det er heilt fantastisk å vera Kongsvinger-spelar om dagen. Det er ikkje mange som hadde trudd at vi skulle gjera det så godt som vi gjer om dagen. Men vi har noko utruleg bra på gong her i klubben, og det er veldig kjekt å ta del i, seier Ørjan Røyrane.

 

– Lite finspel

Han spelte 82 minutt i torsdagens kvartfinalesiger mot Sandefjord, ein jamn batalje Røyrane meiner dei til slutt vann fortent.

– Det blei ein krig frå fyrste minutt. Dei kom i ein 3-4-3-formasjon, som gjorde at vi ikkje fekk spela oss ut frå forsvarsleddet, slik vi pleier å gjera. Difor blei det mykje langballar og lite finspel, men vi får måla våre og vinn til slutt det eg meiner er ein fortent siger, seier Røyrane.

Sidan det er kamp på søndag allereie, har ikkje Kongsvinger fått tid til å feira sigeren enno. Men om ting går slik Strand-Ulv-guten håpar, kan dei kanskje ta feiringa etter semifinalesigeren mot Strømsgodset.

– Godset blir vanskeleg, men det er dei som har alt presset på seg. Det er ingen som forventar at vi kjem til å vinna den kampen. Så vi kan reisa til Marienlyst med låge skuldrar, og kjem forhåpentlegvis til å overraska, seier Røyrane.

Gjer dei det, kan midtbaneteknikaren få sjansen han mista for ti år sidan.

– Det hadde vore heilt fantastisk å få sjansen i ein cupfinale. På grunn av ein skade måtte eg stå over cupfinalen mellom Sandefjord og Lillestrøm for ti år sidan. Det var trist å ikkje kunna bidra, men kanskje kjem sjansen igjen denne sesongen. Eg er i alle fall veldig stolt over det vi har fått til, spesielt over dei unge spelarane våre. Det å sjå at dei tar steget er flott å sjå, og eg trur dei er nøkkelen for Kongsvinger i framtida, sluttar Røyrane.