Furdal signerte for tre nye år

Nest-Sotra sin store son, Johnny Furdal, har teke pennen fatt og signert ein kontrakt som bind han til klubben fram til 2020.

– Eg er blitt veldig glad i klubben og trivst veldig godt her ute. 10 år betyr vel testimonial-kamp, så det er noko eg vil prøva å få med meg, seier midtbaneeleganten frå Omvikdalen til klubben si heimeside.

Han går no inn i sin niande sesong for grøntrøyene, og kan på den tida skilta med imponerande 57 mål og endå fleire assist på sine 125 kampar.

Og no når signaturen endeleg er på plass, kan Ågotnes-publikummet sjå fram til tre nye år med lekre dragningar og ferdigscora pasningar frå Nest-Sotra sin nummer 15.