Furdal skal trena med Brann

Frå i morgon av vert Johnny Furdal å sjå på treningsfeltet til Brann.

– Eg veit ikkje heilt kva som skal skje, men trenaren ringte og sa at Brann ville ha meg og Akin på trening denne veka. Og det er jo noko ein må seia ja til, seier Johnny Furdal til Grenda.

Det var sportssjef i Brann, Rune Soltvedt, som denne veka tok kontakt med Nest-Sotra for å få Johnny Furdal og Akinbola Akinyemi på trening onsdag til fredag.

– Johnny er ein spelar vi har kjent til lenge, og no passa det å gje han sjansen hos oss. Men eg vil understreka at det er ein grunn til at han skal trena med oss. Det er ein spelar vi synst er så interessant at han kan vera aktuell for oss, seier Soltvedt til Bergensavisen.

Så i morgon snører midtbaneeleganten på seg fotballskoa for fyrste gong sidan sesongslutt for å visa Sportsklubben Brann kva han duger til.

– Ein kan vel seia såpass at tidspunktet ikkje er heilt ideelt for meg. Du skal vera i god form for å hevda deg på det nivået, og vi har hatt ferie i eit par veker no, men det kjem uansett til å bli veldig artig, smiler Furdal.

 

Seier ikkje nei

31-åringen, som herja rundt med Brann-spelarane på Ågotnes 31. mai i år, takka hausten 2015 nei til Sogndal. Men om han skulle få tilbodet frå Brann, er han klar på at det ikkje skjer att.

– Nei, det skal mykje til å seia nei til noko slikt. Men det er langt dit, no i fyrste omgang dreier det seg berre om trening, sluttar Furdal.

Allereie etter cupkampen mot Brann 31. mai var Brann-trenar Lars Arne Nilsen klar på at kvalitetane til Furdal var meir enn bra nok for ein klubb som Brann.

– Johnny er rett og slett ein klassespelar. Det er ikkje meir å seia om det. Han har ekstremferdigheiter få andre kan matcha, og han kunne fint spelt hos oss, sa Nilsen til Grenda og la til.

– Han er faktisk så god offensivt at han fint kunne spelt for oss, sjølv med dei defensive manglane han har. Og då er du jaggu meg god.