Gjekk seg inn på E-cuplaget
Niandeplass i opningsrennet og tredje beste nordmann. Martin Femsteinevik har starta sesongen på strålande vis. No ventar europacup i Sverige til helga.
– Det er sånn eg har lyst å gjera det, seier 21-åringen om helgas niandeplass.
Berre Bø-brørne var betre enn Martin i sesongopninga. Bak seg på resultatlista hadde han mellom anna OL-vinnarar som Ole Einar Bjørndalen, Emil Hegle Svendsen og Martin Fourcade.
Artikkelen held fram under annonsen.
E-cup
Dei seks beste norske løparane får gå verdscup. Dei neste seks får gå i IBU-cupen, eller europacupen, som den også blir kalla. Måndag fekk Martin melding om at han er tatt ut til renna i Idre i Sverige til helga.
– Eg reiser på onsdag. Målet mitt har vore å koma på IBU-laget så raskt som råd. Eg vil profittera godt på å vera der og få tevla mot gode skiskyttarar på jamleg basis.
– Kva er sjansen for å få prøva seg i verdscupen?
– Det vil vera ein bonus i år. Men gode prestasjonar i IBU vil vera vegen inn til å få prøva seg der. Det har vore snakk om at nokre av dei beste norske kan koma til å droppa verdscupløpa i USA og Canada, til fordel for VM-førebuingar. Då kan det opna seg ein sjanse der, forklarer Femsteinevik.