Gundersen ny Halsnøy-trenar

Tor Gundersen hadde onsdag si fyrste trening som gul- og blåtrøyene sin nye trenar for 2019-sesongen.

– Det er veldig greitt at dette no er avklart. Det er alltid eit lite vakuum når ting står som usikre, så det å få Tor på plass var veldig kjekt, seier leiar Richard Erlandsen i Halsnøy fotball.

Erlandsen tok den tidlegare damelagstrenaren på senga då han ringte opp for å høyra om han kunne vera interessert i å trena Halsnøy denne sesongen.

– Han såg ikkje det koma i det heile tatt, han hadde vel eigentleg bestemt seg for å ikkje gjera noko denne sesongen. Men så fekk eg han på andre tankar, ler Erlandsen.

Og etter ein eit par rundar med samtalar vart Gundersen presentert for A-laget før onsdagens trening.

– Han vart veldig godt motteke av spelargruppa. Det å få inn eit nytt fjes som ikkje kjenner til spelarane frå før, var noko av det dei såg mest fram til. Det betyr at alle stiller med blanke ark i forhold til posisjon og speletid før den komande sesongen. Så er det berre opp til dei sjølve å visa kva dei er gode for, sluttar Erlandsen.