Halsnøy: Begge laga skal spela bronsefinale
Halsnøy IL gjorde ein enorm prestasjon med å få begge sine lag i Norway Cup heilt til semifinale i A-sluttspelet. Men diverre tapte både gutane og jentene sine kampar. Dermed vert det bronsefinalar i morgon.
Det skal ikkje vera lett å vinna Norway Cup, berre spør Trio sine 14-års gutar som tapte sjølve finalen i fjor.
I år kom tre Kvinnherad-lag heilt til semifinale i A-sluttspelet. Rosendal/Uskedal G 15/16 tapte sin kamp før i dag, og no har også begge laga til Halsnøy tapt.
Artikkelen held fram under annonsen.
Halsnøy J15/16 år (7-ar fotball) har briljert veldig i kampane sine. Dei gjekk til semifinalen med seks strake sigrar og 18-0 i målskilnad. Men Lørenskog vart ein heilt annan motstandar. Stillinga var 0-0 ved pause, men i andre omgang sleppte Halsnøy inn sitt fyrste mål, og det var nok til å tapa. Jentene hadde ein sterk sluttspurt, men fekk ikkje inn utlikninga, trass fleire store sjansar.
Dermed vert det bronsefinale fredag klokka 11.00.
Halsnøy gutar 14 år (7-ar fotball) fekk det knalltøft mot Ørskog IL. Bjørn Einar Hvidevold utlikna til 1-1 i fyrste omgang på eit kanonskot, men det vart til slutt 1-2 før pause. Etter sidebyte rakna det for blåtrøyene, som måtte finna seg i sluttstillinga 1-6. Bronsefinalen vert spelt fredag klokka 10.00.