Halsnøy og Trio får samarbeida

Kretsstyret i NFF Hordaland sa måndag ja til eit samarbeid mellom Halsnøy og Trio i 5. divisjon.

– Dette reddar sesongen. Konsekvensen om det ikkje vart godkjent hadde jo vert at vi måtte ha trekt laget. Så dette er var utruleg kjekt, seier leiar Richard Erlandsen i Halsnøy fotball.

Onsdag kom beskjeden klubbane har venta på etter at søknaden om samarbeid var oppe til ny behandling i kretsstyremøtet måndag.

– Vi fekk jo fyrst avslått søknaden. Og om eg ikkje hadde ringt og gitt dei klar beskjed, så hadde dette aldri skjedd. Men det viktigaste no er at det har ordna seg, og at laget består ut sesongen, seier Erlandsen.

I utgangspunktet var dette eit samarbeid som gjekk i mot retningslinjene til NFF Hordaland. Men kretsstyret fann likevel fram til eit unntak.

– Sjølv om vi har stramma inn regelverket i forhold til slike samarbeidslag, så gjorde vi eit unntak her. Dette handlar ikkje om eit satsingslag som skal satsa for å rykka opp, dette er eit tiltak for å oppretthalda aktivitet. Vi ynskjer då å sjå om dette kan vera eit verkemiddel for å få det til, seier kretsleiar Tore-Christian Gjelsvik i NFF Hordaland.

Sjølv om søknaden er godkjent, ligg det klare vilkår knytt til samarbeidet.

– Søknaden er godkjent for ein sesong. Så i 2019 må Halsnøy igjen stå på eigne bein. I tillegg ligg det til grunn at samarbeidslaget ikkje kan rykka opp, og om Trio skulle rykka ned frå sin 4. divisjon, så rykker også samarbeidslaget automatisk ned, seier Gjelsvik.