Håpar på deltakarrekord
Arrangørane har sett dei strålande vêrmeldingane, og håpar på deltakarrekord i årets Åkraløp, som går av stabelen pinseaftan.
Pinsehelga i Åkra byr på eit svært variert program, forutan løpet vert det tradisjonen tru sandvolleyballturnering, leikar, konkurransar, pubkveld og rotur på fjorden. Søndagen vert det gudsteneste og korkonsert med Røysterett for alle.
Matre idrettslag arrangerer Åkraløpet for 26. gong. Løpet startar ved skulen og går 3,2 kilometer gjennom bygda. Det vert både trim- og konkurranseklasse.
Artikkelen held fram under annonsen.
– Skal du slå løyperekorden til Marit Aarthun i kvinneklassen må du springa raskare enn 11.34, og vil du måla deg mot Martin Femsteinevik må du ned i 10.08, opplyser Knut Reidar Jegteberg i idrettslaget.
I år er løpet ein del av Kvinnheradkarusellen i terrengløp. Arrangørane håpar difor på mange tilreisande til bygda, og satsar på å slå den gamle deltakarrekorden som er på 192 påmeldte.
– Det er meldt fint vêr, så alt ligg til rette for ei kjekk helg, seier Jegteberg.