Jentene gjorde reint bord

Strand-Ulv sine 17- og 19-årsjenter tapte ikkje eit einaste sett då dei denne helga gjekk til topps i begge aldersklassane då den tredje serierunden i volleyball gjekk av stabelen på Stord.

I kamp mot TIF Viking, eit eigen komponert regionslag, Rossvoll, Gneist og Strandvik, viste 19-årsjentene prov på storform då dei fossa gjennom både gruppespel og sluttspel utan å gje frå seg eit einaste sett.

Nærast var dei då regionslaget stod på andre sida av nettet i semifinalen. For etter 25-21 i favør raudtrøyene i fyrste sett, gav jentene frå regionslaget Strand-Ulv kamp til døra i det avgjerande siste settet. Men dei uslåelege jentene frå Hatlestrand, Ølve og Varaldsøy var best då det gjaldt, og vann til slutt 26-24. I finalen mot TIF Viking 2 vann jentene kontrollert 2-0.

17-årsjentene kunne ikkje vera noko dårlegare. Og feia etter tur Rossvoll, Sotra, Strandvik og Sveio av banen i idrettshallen på Stord, og gjekk til topps i 1. divisjon.

Etter å ha surfa gjennom gruppespelet, venta TIF Viking på andre sida av nettet i helgas finale for 17-årsgutane til Strand-Ulv. Eit jamspelt oppgjer der bergensarane til slutt kunne jubla for siger i Sveio. Også Trio var i aksjon denne helga. 17-årsgutane fekk det tøft i gruppespelet og tapte kvartfinalen mot vertane frå Sveio. Og då dei tapte kampen om 5. plassen mot Stord, måtte dei ta til takke med den sure sisteplassen denne helga.

I jenter 17 sin 2. divisjon kunne Strand-Ulv 2 jubla for bronse etter å ha slått Sveio 2 i bronsefinalen. Medan jentene frå Trio slo godt frå seg og vann kampen om 5. plassen mot Møhlenpris.