Klar for finalerunden i OL-kvalifiseringa
Ane Guro Tveit Hjortland og makkeren Sunniva Helland-Hansen bidrog sterkt til at Norge no er klare for finalerunden i OL-kvalifiseringa.
– Det var veldig, veldig kjekt. Målet var å koma inn i finalerunden, så det var utruleg godt å få den siste plassen inn i den avgjerande runden, seier Ane Guro.
Den høgreiste sandvolleyballspelaren frå Hatlestrand har den siste veka vore i austerriske Baden for å kjempa for Norge i den innleiande OL-kvalifiseringsrunden for lag i Europa. Ho og makkeren Sunniva Helland-Hansen opna med tap mot Ukraina, men slo hardt tilbake mot Sverige seinare same dag.
Artikkelen held fram under annonsen.
Sigeren over dei svenske jentene torsdag, sendte Norge til kvartfinalen i Austerrike. Der vart det tap etter ein jamn batalje mot Italia.
– Vi skulle så gjerne slått dei. Det var veldig nærme der, men du må spela godt heile kampen for å ta sigeren, seier Ane Guro.
OL-draumen
Men sjølv om det vart tap i kvartfinalen, gjorde dei to norske laga jobben mot Latvia, og sikra seg den viktige 5. plassen i Baden. Ein plass som gir Norge plass i finalerunden i OL-kvalifiseringa, som går av stabelen i Nederland i slutten av juni.
– Det var fantastisk kjekt. Og sidan Sunniva har gått på college i USA, så prøvde vi å gjenskapa den feiringa dei har der borte. Vi storma banen og hoppa rundt, ler Ane Guro.
Sjølv om dei no er klare for OL-runden, er det eit trongt nålauga som skal passerast før det vert Tokyo-tur på dei norske jentene.
– Du må bli nummer éin i Nederland for å koma til OL. Det er ein lang og vanskeleg veg å gå, for det er veldig mange gode lag med. Men eg drøymer om OL, og OL-draumen lev framleis. Så får det gå som det går, vi har ingenting å tapa, seier Ane Guro.
Før det er klart for finalerunde i Nederland 23. juni, skal Ane Guro og Norge til russiske Sotsji og spela World Tour 23. mai.