Klasseforskjell på Husnes stadion

Trio brukte andre pinsedag på å valsa over Fri på heimebane, og det hadde ikkje vore noko å seia på om resultattavla viste meir enn 6-0 etter 90 minutt.

Aleksander Ekeland sin kampplan om å gå høgt ut og ta styringa på kampen fungerte frå fyrste spark på ballen. Allkan Abdulla, Martin Veastad og Andreas Thorkildsen stressa Fri-forsvaret til å gjera feil på feil, og Håvard Haga, Erik Voster Solberg og Eivind Saghaug hausta nedfallsfrukta som landa på midtbanen.

Raudtrøyene var fyrst i duellane og vann så det som var av andre- og tredjeballar. Dei varierte heile vegen mellom å slå langt i bakrom og å bretta spelet ut på kant og spela overlapp på oppofrande sidebackar.

Dei kvitkledde gjestane frå Fri vart springane mykje mellom og såg slitne ut allereie før halvtimen var spelt.

Og det var då Trio endeleg fekk betalt for sitt høge press. Erik Voster Solberg fekk ballen seksten meter frå mål, kriga seg laus frå ein Fri-stoppar og sklitakla inn det forløysande leiarmålet.

Ti minutt seinare vart vondt til verre for det som var eit tafatt bortelag. Dei vart redusert til ti mann etter at ein av spelarane fekk sitt andre gule kort etter ein liten krangel med Trio-målvakt Eirik Eikeland.

Allkan Abdulla runda av ein god Trio-omgang med å lima eit frispark frå vel 20 meter i lengste kryss på overtid. Til stor jubel frå dei om lag 50 frammøtte.

 

Klasseforskjell

Etter pause viste Trio den store klasseforskjellen som faktisk var laga i mellom. Dei stod høgare i banen og skapte sjanse på sjanse. Den største signert Andreas Røyrvik ti minutt etter sidebyte. Men kraftspissen fekk ikkje stokka beina skikkeleg og sendte den ferdigscora pasningen frå Andreas Thorkildsen over mål frå tre meters hald.

Då var det godt for Trio sin nummer ti at han berre to minuttar, etter eit godt innlegg frå høgreback Vebjørn Holmedal, faktisk fekk stokka beina og enkelt trilla inn 3-0 til heimelaget føre eit fullstendig resignert Fri-mannskap.

Eivind Tufta Saghaug auka like etter til 4-0, etter eit fantastisk forarbeid av midtstoppar Åsmund Voster.

Så var det Christer Olderkjær sin tur å koma på scoringslista. I rolla som luftens baron nikka høgrebacken inn det som var ein godt slått corner frå Eivind, og sørgja med det for at Trio gjekk opp i 5-0.

Og når det stod att 20 minutt av kampen, var Røyrvik igjen i aksjon. Simon Korttila stod for grovarbeidet og serverte Røyrvik ballen inne i feltet. Kraftspissen hadde roen og fastsat sluttresultatet til 6-0. Ikkje ei scoring for lite.

- Vi er mykje betre enn dei og skaper sikkert bortimot tjue målsjansar. Så at vi berre scorar seks er eigentleg smått sjukt, seier Aleksander Ekeland etter kampen.

Han var likevel strålande nøgd med måten spelarane står fram på.

- Vi er betre i alle fasar og får godt betalt for at vi er mykje betre trent enn dei. Planen fungerte og spelarane leverer ei imponerande førestilling. No er vi på toppen av tabellen og er framleis ubesigra etter sju seriekampar, smiler Ekeland.

Banens best i førre helgs lokaloppgjer mot Halsnøy, Håvard Haga, er i storslag om dagen. Og kunne også etter dagens kamp smila for nok ei bestemanns-notering.

- Det begynnar å løysa seg for meg no. Det er kjekt å spela fotball om dagen, og så er det lettare å vera god når resten av laget er så på som dei er no. Då er det heilt greitt å vera ballryddar på midten, smiler han som var best av mange gode på Trio i dag.

 

Trio 6-0 Fri (2-0)

433: Eirik W. Eikeland, Henning Solheim, Åsmund Voster, Espen Saghaug, Marius Myklebust, Håvard Haga, Eivind Saghaug, Erik Voster Solberg, Andreas Thorkildsen, Martin Veastad og Allkan Abdulla. (Andreas Røyrvik, Vebjørn Holmedal, Christer Olderkjær, Futsum Mebrahtu, Nikolai Mayer, Simon Korttila og Vebjørn Røssland)